काठमाडौँ - नेपाल फलफूल थोक व्यवसायी संघले तिहारको समयमा काठमाडौँ उपत्यकामा मात्रै २५ करोड रुपैयाँ बराबरको फलफूल खपत हुने अनुमान गरेको छ ।
गत असोजमा आएको अविरल वर्षापछि बाढीपहिरो र नाकामा असहज हुँदा धेरै फलफूल बिग्रिएको र तिहारको लागि अर्डर गरेको फलफूल अझै आइनसकेकाले अघिल्ला तिहारको तुलनामा भने कम खपत हुने संघको भनाई छ । यद्यपि देशभर करोडौँ रुपैयाँको फलफूल बिक्री हुने जनाइएको छ ।
अघिल्ला वर्षहरूको जस्तो तिहारमा फलफूल व्यापारको रौनक समेत नभएको संघका अध्यक्ष अमर बानियाँले बताए ।
अहिले बजारमा चीनबाट ल्याएको स्याउ अंगुर आँप हलुवावेद, भारतबाट सुन्तला, केरा, स्याउ, खर्बुजालगायत विभिन्न फलफूल आइरहेको संघले जनाएको छ । नेपालमै पनि पर्याप्त मात्रामा स्याउ र केरा उत्पादन भएको संघले जनाएको छ ।
चीनबाट स्याउ नआउँदा यस वर्ष मुस्ताङको स्याउले नसोचेको व्यापार गरिरहेको बानियाँले बताएका छन् ।
