काठमाडौं– नेकपा एमालेका अध्यक्ष केपी शर्मा ओली नेतृत्वको अहिलेको सरकारलाई नेपाली कांग्रेसले बलियोसँग काँध थापेका उदाहरण बनिरहेका छन् शेरबहादुर देउवा। 

सरकारमाथि चौतर्फी आलोचना भए पनि कांग्रेस सभापति देउवाले त्यसको बचाऊ गरी सय दिनमा राम्रो काम भएको टिप्पणी गरेका छन्। 

कांग्रेस भक्तपुरले शनिबार आयोजना गरेको शुभकामना आदानप्रदान कार्यक्रममा सभापति देउवाले लोकतन्त्रमा सरकारविरुद्ध आलोचना हुनु स्वाभाविक भएको भन्दै सरकारको सय दिनमा निकै राम्रो काम भएको बताएका हुन्।

सरकारका विषयमा भएका आलोचनालाई मध्यनजर गर्दै आगामी दिनमा अझै राम्रो काम गर्न प्रधानमन्त्रीलाई आफूले सुझाव दिने उनले बताए।

देउवाले यति मात्र भनेनन्। कांग्रेसका नेता कार्यकर्ता नै एमालेसँगको सहकार्यका कारण खुसी रहेको पनि बताएका थिए। यसअघि पनि सरकारको आलोचना हुँदा देउवाले त्यसलाई स्वभाविक मान्दै सम्झौताअनुसार गठबन्धन बलियो रहने टिप्पणी गरिरहेका थिए।

देउवा ओली सरकारको बलियो वैशाखी बनिरहेका छन्। उनको यो अडानले संख्याका आधारमा तत्काल सरकार संकटमा पर्छ भन्ने संकेत गर्दैन।