काठमाडौँ-नेपाल प्रिमियर लिग (एनपीएल) का लागि विराटनगर किंग्सको ट्यालेन्ट हन्ट कार्यक्रम कात्तिक २६ गतेबाट कोशी प्रदेशका ५ जिल्लामा सुरु हुने भएको छ ।
विराटनगर किंग्सको लागि ३-५ जना खेलाडी हरेक जिल्लाबाट छानेर विराटनगरमा हुने तयारी क्याम्पमा सामेल गर्ने उद्देश्य सहित उक्त क्याम्प हुन लागेको विराटनगर किंग्सका अपरेसन डाइरेक्टर दिपेन्द्र चौधरीले जानकारी दिए ।
ट्यालेन्ट हन्टमा टिमका क्रिकेट कोच लाक्पा लामा र दिपेन्द्र चौधरीले छान्ने छन् कोशी प्रदेशको इलाममा कार्तिक २६ गते, झापामा कार्तिक २७ गते ,सुनसरीमा कात्तिक २९ गते, उदयपुरमा कार्तिक ३० गते, मोरंगमा मङ्सिर २ गते उक्त ट्यालेन्ट हन्ट आयोजना हुनेछ । कोशी प्रदेश क्रिकेट एसोसिएसनको सहकार्यमा उक्त ट्यालेन्ट हन्ट आयोजना हुन लागेको हो ।
विराटनगर किंग्सको मार्की खेलाडी सन्दीप लामिछाने रहेका छन् । ‘कोशीको शान हाम्रो पहिचान’ भन्ने नारा सहित टिम कोशीका उदयमान खेलाडीहरूको खोजीमा निस्कन लागेको हो ।
