मकवानपुर- राष्ट्रिय स्वतन्त्र पार्टी (रास्वपा) मकवानपुरले हेटौंडा उपमहानगरपालिका वडा नम्बर-१२ को उपनिर्वाचनको उम्मेदवार टुङ्गाएको छ ।
हेटौंडा उपमहानगरपालिका वडा नम्बर–१२ को वडा अध्यक्षका लागि मंसिर १६ मा उपनिर्वाचन हुनेछ । आइतबार वडा, नगर र जिल्ला कार्यसमितिको संयुक्त बैठकले आशावीर बललाई वडा अध्यक्षको उम्मेदवारमा रास्वपा मकवानपुरले अघि सारेको हो ।
‘हेटौंंडा उपमहानगरपालिका वडा नम्बर–१२ मा विभिन्न समाजिक कार्यहरूमा सहभागिता जनाउँदै आइरहेका बललाई रास्वापाको उम्मेदवार पाएका छौँ, आशावीर बल सक्षम उम्मेदवार हुनुहुन्छ’ नगर सभापति धुर्वबहादुर विष्टले भने । यहाँ रिक्त रहेको पदमा रास्वपाले सर्वाधिक मत ल्याएर वडा अध्यक्ष पदमा निर्वाचित हुनेमा कुनै शंका नरहेको मकवानपुर क्षेत्र नम्वर १ सभापति टाकाराज थापाले दाबी गरे ।
‘हाम्रो उम्मेदवार पुराना दलभन्दा कुनैपनि कुराले कमजोर छैन ।’ रास्वपा मकावानपुरका सभापति भरत पराजुलीले भने । ‘यो पल्ट हेटौंडा-१२ नम्बरका जनता सचेत छन् ।
पक्कै पनि देशको राजनीति अवस्था अबलम्बन गरेर मतदान गर्नु हुनेछ भन्नेमा हामी ढुक्क छौँ ।’ उनले थपे । यसैगरी, अन्य उम्मेदवारमा एकीकृत समाजवादीबाट बलराम बल, राप्रपाबाट प्रेम लामा ब्लोन, कांग्रेसबाट सम्भावित अर्जुन तिवारी, एमालेबाट सम्भावित राजेश नगरकोटी र माओवादीबाट सम्भावित रबिन प्रधान रहेका छन् ।
