काठमाडौं- नेपाल विद्युत् प्राधिकरणका प्रबन्ध निर्देशक कुलमान घिसिङले देशको औद्योगिक वातावरण बिगारेको भनेर लगाएको आरोपप्रति आपत्ति जनाएका छन् ।

बुधबार रत्नपार्कस्थित प्राधिकरण कार्यालयमा पत्रकार सम्मेलन गर्दै उनले आफू देशमा औद्योगिक वातावरण हुनुपर्छ, उद्योग स्थापना हुनुपर्छ भन्ने कुरामा दृढ रहेको बताए ।

त्यहीअनुसार विद्युत् प्राधिकरण लागिरहेको पनि उनले जानकारी दिएका छन् । ‘यसअघि लोड पनि डेडिकेटेड र ट्रंक लाइनको बक्यौता नतिरेसम्म जोड्नु हुँदैन भनेर विनियमावलीमा व्यवस्था गरेका थियौँ। बक्यौता भएकालाई थप लोड स्वीकृत नगर्ने भनेका थियौँ’, उनले भने, ‘तर त्यसलाई संशोधन गरेर हामीले पछिल्ला चार वर्षमा ८ सय मेगावाट लोड उद्योगका लागि स्वीकृत गरेका छौँ । करिब १३ सय मेगावाटको लोड हालसम्म उद्योगका लागि स्वीकृत भएको छ ।’

घिसिङले साधारण ग्राहकको भन्दा पनि औद्योगिक ग्राहकको शुल्क कम रहेको पनि बताएका छन् ।

‘हामीले उद्योग बढाउन प्राथमिकता दिएका छौँ । उद्योगका साथीहरू बक्यौता तिर्नेभन्दा विवादित बनाउने र राजनीतिकरण गर्ने काममा लाग्नु भएको छ’, उनले भने, ‘जुनबेला लाइन काटिन्छ अनि हल्ला सुरु हुन्छ । उद्योगले जति पनि उत्पादन गरेको हुन्छन्, कम्तीमा पनि एक महिनालाई पुग्ने हुन्छ । कुनै पनि उद्योग पूरा क्षमतामा चलेको हुँदैन । उहाँहरूको सामान जबसम्म विक्री हुन्न तबसम्म लाइन जोड्न आउनु हुन्न । तर सामान बिकिसकेपछि हल्ला सुरु हुन्छ ।’

उनले सामान बेचिसकेपछि उद्योगीहरू बेरोजगारी बढायो, उद्योग बन्द गरायो, नेपालको अर्थतन्त्र तहसनहस गरायो भनेर ‘इमोशनल ब्यालकमेलिङ’ गर्ने काममा लाग्ने गरेको बताए ।

उनले बाँकी रहेको बक्यौता उठाइछाड्ने दृढता व्यक्त गरे । ‘यसमा दृढ छु, म दायाँबायाँ गर्दिनँ । बक्यौता उठाउन खोज्दा राजनीति गर्‍यो भन्नु गलत हो’, उनले भने, ‘बक्यौता उठाएर प्राधिकरणलाई बलियो बनाउनु राजनीति होइन र हुँदैन ।’