काठमाडौं– नेपाल विद्युत प्राधिकरणका कार्यकारी निर्देशक कुलमान घिसिङले आफूसहित सरकारविरुद्ध कसैलाई मुद्दा हाल्न नलगाएको जवाफ

दिएका छन्। बुधबार पत्रकार सम्मेलनका क्रममा घिसिङले यस्तो बताएका हुन्। 

उनलाई प्राधिकरणका कानुनी सल्लाहकारको ल फर्मका कर्मचारी खडानन्द अधिकारीमार्फत सर्वोच्च अदालतमा रिट हाल्न लगाएको चर्चा सतहमा आएको थियो। 

घिसिङसँग पत्रकारले सोधेका ५ प्रश्न र त्यसका उत्तर यस्ता छन्।
 

तपाईले आफ्नै वकिलबाट मुद्दा हाल्न लगाउनु भयो ?

नेपालको नागरिकले मुद्दा दर्ता गर्न पाउँछ । सार्वजनिक सरोकारको बिषय हो । मैले लगाइराख्नै पर्दैन । यहि बिषयमा पहिले पनि धेरै मुद्दा गएका छन् । लाल आयोग गठन भएको छ कि छैन भन्ने पनि मुद्दा छ । लाल आयोग लागू गरेको ठिक छ कि छैन भन्ने पनि मुद्दा छ । त्यस्तो खालको काम हामीले गरेका छैनौँ र गर्ने पनि छैनौँ ।

 प्रिमियमको कुरालाई लिएर तपाईले प्राधिकरणलाई जोखिममा रहेको भनेर बढाइचढाइ गर्नु भयो कि ?

बक्यौता उठाउन खोज्दा उद्योगीहरूले तिर्न अटेर गरेका छन् । त्यो नतिर्न अनेक निर्णय हुन थालेको छ । त्यो बक्यौता नउठ्दा अरू पनि उठ्न कम हुन थालेका छन् । नागरिकले पहिले त्यो अरबौँ उठाउँनु अनि मात्र हामीसँग उठाउन आउनु भन्न थालेका छन् । त्यसले गर्दा प्राधिकरणलाई समस्या पर्छ भनेको हुँ । 

प्रिमियम भन्दा अरू पनि थपेर तिर्न भन्नु भएको छ रे ?

प्रिमियम मात्र लगाएको छ । मिटरमा जोडेर प्रिमियम लगाइएको हो । अरू केहि लगाइएको छैन । लाल आयोग, अदालत र सम्बन्धित निकायले भनिसकेको छ । अरूले भन्नु पर्ने कुरा पनि होइन । लाल आयोग अनुसार नेपाल सरकारले निर्णय गरेर दिएको छ । नेपाल सरकार मन्त्री परिषदको निर्णय अनुसार हामी चल्नु पर्ने हो । हामीले त्यहि गरिरहेका छौँ । 

तपाईले प्रमाण दिन सक्नु भएन भन्ने कुरा छ त ?

हामीले पटक पटक भनेका छौँ । हामीले एक्सेलमा नै पठाएका छौँ । टिओडी मिटरमा कति खपत थियो, त्यसको शुल्क कति हो भनेर एक्सेल सिट नै पठाएका छौँ । समितिमा त मैले दुइ दुइ घण्टा छलफल गरेको छु । मैले १ लाख पेजको कागजात नै पठाएको छु । यो त मैले अहिले आएर बिल देखाउने भन्ने कुरा नै होइन । कि त अदालत वा कानूनी निकायले भनिदिनु पर्यो । हामीबिचमा नै विवाद आए पछि हामीले मात्र मिलाउँन सक्ने कुरा होइन । सम्बन्धित निकायले नै बिल ठिक छ भने पछि हामीले के भन्ने ?

भारतबाट बिजुली महँगोमा ल्याउनुभयो, त्यसमा कमिशन खायो भन्ने आरोप छ नि? 

इन्डियाबाट महंगोमा लिएको विद्युत भनेर गलत प्रचार गरेको छ । हामीले दैनिक बिडिङ गरेर लिने हो । बेच्दा पनि त्यसरी नै बेच्ने हो । दैनिक बिडिङ गरेर ल्याएकोमा कसरी भन्न सक्नु हुन्छ कमिसन खायो भनेर ? यो गलत आरोप हो ।