काठमाडौ - बेलायती सञ्चार संस्था द गार्जियनले अबदेखि सामाजिक सञ्जाल एक्स (पहिले ट्विटर)मा आफ्नो आधिकारिक खाताबाट अब कुनै सामग्री पोस्ट नगर्ने घोषणा गरेको छ । बुधवार गार्जियनले सूचना जारी गर्दै एक्समा कुनै पनि सामग्री आफ्नो आधिकारिक खाताबाट पोस्ट नगर्ने घोषणा गरेको हो ।
एक्समा धेरै नकारात्मकता भएका कारण आफूहरूले यस्तो निर्णय गरेको गार्जियनले सूचनामा उल्लेख गरेको छ । तर अन्य प्रयोगकर्ताहरूले भने एक्समा गार्जियनका सामग्रीहरू पोस्ट गर्न सक्ने बताएको छ । ‘हामीले हाम्रो आधिकारिक सम्पादकीय खाताबाट एक्समा पोस्ट गर्न बन्द गरेका छौँ,' गार्जियनले भनेको छ, 'तर एक्सका प्रयोगकर्ताहरूले हाम्रो समाचारहरू शेयर भने गर्न सक्छन् ।'
पोस्ट नगर्ने कारण के हो ?
एक्समा प्रायः विचलित पार्ने खालको सामग्री पाइने भन्दै गार्जियनले लामो समयदेखि यसबारे सोचिरहेको पनि बताएको छ । एक्समा अति दक्षिणपन्थी प्रोपोगान्डा र नस्लवादसँग सम्बन्धित सामग्रीहरूलाई बढावा दिएको गार्जियनको दाबी छ ।
‘हामीलाई लाग्छ ‘एक्स’ मा अहिले धेरै नै नकारात्मकता छ । हामी हाम्रो पत्रकारितालाई थप बढावा दिन संसाधनहरूको राम्रो प्रयोग गर्न सक्छौँ’ गार्डियनले लेखेको छ ।
अमेरिकी निर्वाचनले पनि एक्स टक्सिक सामाजिक सञ्जाल रहेको प्रमाणित गर्ने गार्जियनको दाबी छ । एक्सका मालिक एलन मस्कले अमेरिकी निर्वाचनमा खेलेको भुमिकाले राजनीतिक वातावरण समेत प्रभाव पार्न सक्ने भन्दै अबदेखि एक्समा केही पनि पोस्ट नगर्ने निर्णय गरेको गार्जियनले जनाएको छ ।
‘अमेरिकी चुनावले पनि प्रमाणित गरेको छ कि एक्स एक विषाक्त प्लेटफर्म हो र यसको मालिक एलन मस्कले राजनीतिक वातावरणलाई प्रभाव पार्न प्रयोग गर्न सक्छ, गार्जियनले लेखेको छ ।
हालै सम्पन्न अमेरिकाको राष्ट्रपतीय निर्वाचनमा एलन मस्कले डोनाल्ड ट्रम्पलाई खुलेर सहयोग गरेका थिए । ट्रम्पले जितेपछि 'अब तिमि हौ मिडिया' एलन मस्कले एक्समा लेखेका थिए । यसरी उनले मिडियालाई चिड्याएका हुन् कि भन्ने पनि बुझिन्छ ।
