काठमाडौँ- उत्तरी गोरखाको धार्चे गाउँपालिकामा पाँच शय्याको आधारभूत अस्पताल निर्माण भएको छ ।
देशभरका सबै पालिकामा आधारभूत अस्पताल बनाउने सरकारको योजना अनुरूप धार्चे गाउँपालिका-३ खोर्लावेशीमा अस्पताल निर्माण गरिएको हो ।
स्वीटजरल्याण्डको अर्थ सी एयर नामक संस्था र गाउँपालिकाको साझेदारीमा अस्पताल भवन निर्माण भएको प्रमुख प्रशासकीय अधिकृत काजीमान सुनारले जानकारी दिए । भवनमा पाँच वटा ब्लक रहेको छ ।
अस्पताल निर्माणका लागि १२ असोज २०७६ मा छाया नेपाल र पालिकाबीच सम्झौता भएको थियो । पालिकाका अनुसार भवन निर्माण कार्य गत बर्ष नै सकिएको हो । अस्पतालको बुधबार एक कार्यक्रमका बीच गण्डकी प्रदेश सांसद सुशीला सिंखडा र गाउँपालिका अध्यक्ष लक्ष्मण गुरुङले उद्घाटन गरेका छन् ।
सो अस्पतालमा २४ घण्टा आकस्मिक सेवा, सामान्य चिकित्सा सेवा, ओपिडी सेवा, प्रसूति सेवा, ल्याब सेवा, खोपसम्बन्धी सेवा, दन्त सेवा, इसिजी, एक्स-रे, भिडियो एक्स-रे, फार्मेसी सेवा उपलब्ध हुने बताइएको छ । पोष्टमार्टम र शव परीक्षण सेवाहरू पनि उपलब्ध हुने पालिकाले जनाएको छ ।
पालिकाका अनुसार अस्पतालको जनशक्तिका रूपमा हाल दुई जना मेडिकल अफिसर, तीन जना स्टाफ नर्स, तीन जना हेल्थ असिस्टेन्ट, एक जना रेडियोग्राफी, एक जना फार्मेसी एसिस्टेन्ट, एक जना ल्याब टेक्निसियन, एक जना डेन्टल हाइजिनिक र चार जना कार्यालय सहयोगी रहेका छन् ।
आधारभूत अस्पताल निर्माण भएसँगै अहिले धार्चेसँगै चुमनुब्रीका स्थानीय बासिन्दालाई पनि स्वास्थ्य सेवा लिन निकै सहज हुने अपेक्षा गरिएको छ ।
