काठमाडौँ- नेकपा एमालेका कार्यकर्ताले दरबारमार्ग क्षेत्रमा गरेको फोहोर काठमाडौँ महानगरपालिकाले सफा गरिरहेको छ । महानगरपालिकाको सफाइ कर्मचारीले कार्यक्रम सकिएसँगै सफाइ गरिरहेको हो । 

कार्यक्रम सकिएसँगै सडक पेटीका साथै सडकमा पनि यत्रतत्र छरिएको पानीको बोतल, चाउचाउको खोललगायतका फोहोर जम्मा गरिरहेका हुन् । सफाइको काम राति अबेरसम्म जारी रहेको महानगरपालिकाका एक कर्मचारीले बताए । 

जागरणको नाममा एमालेले दरबारमार्गमा शुक्रबार कार्यक्रम गरेको थियो । यसैबिच महानगरपालिकाले फोहोर गरेको भन्दै एमालेलाई जरिवाना गरेको छ । 

काठमाडौँ महानगरका नगर प्रहरी निरीक्षक लिलाराज गाछाको हस्ताक्षरमा एमाले पार्टी कार्यालयका नाममा प्रेषित पत्रमा फोहोर गरेर वातावरण प्रदूषण समेत गरेकाले जरिवाना गरिएको उल्लेख छ ।