काठमाडौं- राष्ट्रिय स्वतन्त्र पार्टी (रास्वपा)ले मतदाताहरूमा वितृष्णा तथा निराशा देखिएको जनाएको छ ।

रास्वपा स्थानीय तह उपनिर्वाचन केन्द्रीय संयोजन समितिका संयोजक गणेश पराजुलीले विज्ञप्तिमार्फत नागरिक मताधिकारको अभ्यासमा मतदातामा वितृष्णा तथा निराशा देखिएको जनाएका हुन् ।

लोकतन्त्रको महत्वपूर्ण अंगका रूपमा रहेको आवधिक निर्वाचनमा सहभागी हुने औसत मतदाता घट्दो क्रममा रहेको उनको भनाइ छ । मतदाताहरूलाई मतदानमा सहभागी हुन प्रेरित गर्नका साथै निर्वाचित जनप्रतिनिधिहरुले निभाउनुपर्ने भूमिका र गर्नुपर्ने कार्यसम्पादनका सम्बन्धमा रास्वपा सचेत रहेको विज्ञप्तिमा उल्लेख छ । स्थानीय तह उपनिर्वाचनमा आफ्ना उम्मेदवारलाई मत दिएकोमा मतदाताहरूलाई रास्वपाले धन्यवाद ज्ञापनसमेत गरेको छ ।