काठमाडौ - नेकपा (एमाले)का वरिष्ठ उपाध्यक्ष ईश्वर पोखरेलले प्रधानमन्त्री केपी शर्मा ओलीको चीन भ्रमण फलदायी हुने दाबी गरेका छन् ।
चीन भ्रमणको विषयमा बेल्ट एण्ड रोड इनिसिएटिभ (बिआरआई)परियोजनालाई लिएर विभिन्न अड्कलबाजी भइरहेको भएपनि त्यो सत्य नरहेको बताएका हुन् ।
भ्रमणका क्रममा विभिन्न परियोजनाबारे औपचारिक छलफलहरु जारी रहेको उल्लेख गर्दै बिआरआई परियोजनाबारे अहिले नै बोल्नु गलत हुने बताएका हुन् ।
उनले बीआरआई परियोजनाबारे ज्वाइन्ट स्टेटमेण्ट आएपछि मात्र सबै कुराको जानकारी पाइने बताए ।
उनले बिआरआई परियोजना राष्ट्रिय स्वार्थको विषय भएकाले अग्राधिकार दिएर अघि बढ्ने कुरामा नेपाली काँग्रेस र नेकपा एमालेबीच सहमतिको दस्तावेज तयार भएको बताए ।
उनले बिआरआईलाई लिएर काँग्रेस नकारात्मक र एमाले सकारात्मक छ भन्ने भ्रम फैल्याइएपनि आफूहरु सहमतिमै अघि बढेको जिकिर गरे ।
उनले भने– ‘खासगरी बिआरआईलाई हेर्ने सन्दर्भमा बाहिर अनेक ढंगले अड्कलबाजीहरु भइरहेका थिए । बिआरआईका सम्बन्धमा कांग्रेस नकारात्मक र एमाले सकारात्मक छ भन्ने ढंगले पनि कुराहरु बाहिर आइरहेका थिए ।
त्यस्तो होइन हामी राष्ट्रिय स्वार्थको विषयलाई अग्राधिकार दिएर अगाडि बढ्छौं कांग्रेस र एमालेले नेपालको राष्ट्रिय राजनीतिमा नयाँ खालको सहमतिको दृष्टान्त हो स्थापित गरेका छौं । जहाँसम्म भ्रमणको कुरा छ आज समकक्षि चिनियाँ प्रधानमन्त्री र राष्ट्रपतिसँग पनि भेट भइसकेको जानकारी हामीले पाएका छौं ।
थप विवरण त भोलि जोइन्ट स्टेटमेण्ट आउँला त्यसमा आउनेछन् । हाम्रो पारस्परिक समझदारीमा बनेको तयारीका आधारमा कुराहरु भएका छन् । कुराहरु फलदायी ढंगले भएका छन् ।’
उनले प्रधानमन्त्रीको पहिलो भ्रमण आवश्यकताको आधारमा जुनसुकै मित्रराष्ट्रको हुनसक्ने कुरामा काँग्रेस र एमालेबीच एकमत रहेको उल्लेख गर्दै यसलाई अन्यथा लिन नहुने बताए ।
उनले प्रधानमन्त्रीको चीन भ्रमण मुलतः राजकीय भ्रमण भएपनि पार्टीगत सम्बन्ध पनि सुमधुर हुने विश्वास व्यक्त गरे ।
उनले भने– ‘चीन र नेपालबीचको सम्बन्धको विषयलाई तीन वटा आयामबाट हेर्न जरुरी छ । एउटा, राजकीय सम्बन्ध, अर्को कम्युनिष्ट पार्टीहरुबीचको सम्बन्ध र जनस्तरको सम्बन्ध । यो तीन विषयका हिसाबले नेपाल–चीन सम्बन्धलाई बुझ्नुपर्छ जस्तो लाग्छ । यसपटक प्रधानमन्त्री केपी शर्मा ओलीको चीन भ्रमण मुलतः राज्यस्तर राजकीय भ्रमण हो ।’
काँग्रेस र एमाले आवश्यकताको आधारमा छिमेकी देशको भ्रमण गर्ने पक्षमा रहेको बताए । प्रधानमन्त्री ओलीको चीन भ्रमणका क्रममा नेपाल र चीनबिच विभिन्न समझदारी पत्रमा हस्ताक्षर भएका छन् ।
जसमा भैँसीको तयारी मासु निर्यातसम्बन्धी प्रोटोकलमा हस्ताक्षरदेखि नेपाल–चीन व्यापार अभिवृद्धि सम्बन्धी सम्झदारीपत्रमा पनि हस्ताक्षर भएको छ ।
चीनले प्रश्ताव गरेको बीआरआई कार्यान्वयन योजनाको विकल्पमा नेपालले प्रश्तुत गरेको ‘फ्रेमवर्क अफ बेल्ट एण्ड रोड कोअपरेसन’ सम्झौतामा दुवै देशले चासो दिएका छन् ।
नेपालले प्रश्तुत गरेको बिआरआई सम्बन्धी ‘फ्रेमवर्क अफ बेल्ट एण्ड रोड कोअपरेसन’ सम्झौतामा सहमति जुटेको छ । यद्यपि पुष्टि हुन बाँकी छ ।
