काठमाडौं - काठमाडौंमा आज दिनभर बदली हुनेछ । आंशिकदेखि पूर्णतया बदली हुने जल तथा मौसम विज्ञान विभागले जनाएको छ ।
काठमाडौंमा आज दिउँसो वर्षाको सम्भावना रहेको छ । “काठमाडौंमा बदली रहेकाले आज वर्षाको सम्भावना पनि छ,” मौसमविद् मीनकुमार अर्यालले भने, “हामीले हल्का वर्षा काठमाडौंमा पनि हुन्छ भनेका छौँ । तर, वर्षाको सम्भावना उच्च भने छैन ।”
काठमाडौंका केही स्थानमा पूर्ण बदली भइ दिउँसो जुनसुकै समय वर्षा हुनसक्ने सम्भावना रहेको उनले बताए ।
“यो ठूलो प्रणाली विकास भएको होइन । विकास भएको प्रणालीले सुदूरपश्चिम र कर्णालीमा असर गर्ने हो,” मौसमविद् आर्यालले भने, “त्यसको केही असर यता (काठमाडौं) आएर वर्षा गराउने हो । स्थानीय वायु सक्रिय भएर पश्चिमी वायुलाई सपोर्ट गर्यो भने वर्षा हुने हो ।”
काठमाडौंमा आज रातिबाट मौसम सफा हुनेछ । भोलिबाट मौसम पूरै सफा हुने उनले जानकारी दिए ।
