काठमाडौं- चर्चित क्रिकेटर ब्रायन लारा नेपाल आइपुगेका छन् । लारा आज (शुक्रबार) बिहान नेपाल आइपुगेका हुन्।
नेपाल क्रिकेट संघ (क्यान) ले नेपाल प्रिमियर लिग (एनपीएल) का लागि लारा नेपाल आएको जनाएको छ । वेष्ट इण्डिजका क्रिकेटर लाराको नाममा टेस्ट क्रिकेटमा एकै इनिङमा नटआउट ४ सय रन बनाउने कीर्तिमान छ ।
५५ वर्षे लाराले ओडीआई र टेस्ट क्रिकेट दुवैमा १० हजारभन्दा बढी रन बनाएका छन् । आज बिहान आइपुगेका लारालाई क्यानका पदाधिकारीहरूले स्वागत गरेका थिए । कीर्तिपुरस्थित त्रिवि क्रिकेट मैदानमा जारी नेपाल प्रिमियर लिग (एनपीएल) हेर्न उनी नेपाल आएका हुन् ।
क्यानका अनुसार लाराले एनपीएलका केही खेल हेर्नेछन् । लाराले बुधबार मात्रै सामाजिक सञ्जालमार्फत आफू एनपीएलका खेल हेर्न इच्छुक रहेको बताएका थिए । लाराले नेपालमा तीन–चार दिन बिताउने छन् । उनी एनपीएल फाइनलसम्म भने नबस्ने बताइएको छ ।
