काठमाडौं– विश्वका महान क्रिकेटर ब्रायन लारा नेपाल प्रिमियर लिग (एनपीएल) हेर्न र नेपाली खेलाडीसँग अनुभव साट्नका लागि काठमाडौं आइपुगेका छन्। शुक्रबार उनी काठमाडौं आइपुगेका हुन्। 

वेस्ट इन्डिजका तिव्र गतिका ब्याट्सम्यानलाई किन महान् खेलाडी मानिन्छ?

ब्रायन लारा जसलाई ‘प्रिन्स अफ पोर्ट अफ स्पीन’ र ‘दी मास्टर ब्लास्टर’ भनेर चिनिन्छ। वेस्ट इन्डिज क्रिकेट इतिहासका सबैभन्दा प्रतिष्ठित खेलाडीहरू मध्य एक हुन्। उनको जन्म २ मे १९६९ मा त्रिनिदाद र टोबागोको सान्ता क्रुजमा भएको थियो।

ब्रायन चार्ल्स लाराको बाल्यकालदेखि नै क्रिकेटमा गहिरो रुचि थियो। उनको प्रतिभा किशोरावस्थामा नै देखिन थालेको थियो। उनले प्रारम्भिक क्रिकेट त्रिनिदादको फाटि स्थित कलेजमा खेले। १५ वर्षको उमेरमा उनले त्रिनिदादको अन्डर–१९ टोलीमा स्थान पाएका थिए।

लाराले वेस्ट इन्डिजका लागि १९९० मा अन्तर्राष्ट्रिय क्रिकेटमा डेब्यु गरे। उनी मुख्यतया आफ्नो अद्वितीय ब्याटिङ शैली, उच्च स्कोरिङ क्षमता र कठिन परिस्थितिमा उत्कृष्ट प्रदर्शन गर्ने क्षमताका लागि चर्चित छन्।

ब्रायन लाराले टेस्ट क्रिकेटमा धेरै किर्तिमान राखेका छन्। 

१९९४ मा इंग्ल्यान्डविरुद्ध उनले ३७५ रनको व्यक्तिगत पारी खेलेर टेस्ट क्रिकेटमा सबैभन्दा धेरै रन बनाउने कीर्तिमान बनाएका थिए। 

यो रेकर्ड पछि म्याथ्यु हेडनले तोडे पनि लाराले फेरि २००४ मा ४०० रनको ऐतिहासिक पारी खेलेर आफ्नो रेकर्ड पुनःस्थापित गरे।
लाराले एकदिवसीय क्रिकेटमा पनि उल्लेखनीय प्रदर्शन गरेका छन्। 

उनले वेस्ट इन्डिजका लागि १० हजारभन्दा बढी रन बनाएका छन् र धेरै निर्णायक खेलहरूमा महत्वपूर्ण भूमिका खेलेका छन्। उनको आक्रमणकारी ब्याटिङ शैली र रणनीतिक सोचले वेस्ट इन्डिजलाई धेरै खेल जित्न मद्दत गरेको छ।

टेस्ट क्रिकेटमा इङ्ल्यान्डविरुद्ध सबैभन्दा ठूलो व्यक्तिगत स्कोर ४०० रन बनाएका थिए।

फर्स्ट–क्लास क्रिकेटमा सबैभन्दा ठूलो स्कोर ५०१ रन (वारविकशायरको लागि खेल्दै) बनाएका थिए। 

१०,००० रन टेस्ट र एकदिवसीय दुवै फर्म्याटमा पूरा गर्ने वेस्ट इन्डिजका पहिलो खेलाडी।

क्रिकेटबाट सन् २००७ मा सन्यास लिएपछि लाराले सामाजिक र परोपकारी काममा ध्यान केन्द्रित गरेका छन्। उनी विभिन्न स्वास्थ्य, शिक्षा, र खेलकुदसँग सम्बन्धित परियोजनामा संलग्न छन्। उनलाई विश्वभरका क्रिकेट प्रशंसकहरूबाट सम्मान प्राप्त छ।

ब्रायन लारा केवल वेस्ट इन्डिजकै होइन, सम्पूर्ण क्रिकेट इतिहासका महानतम खेलाडीहरूमध्ये एक हुन्। उनको अद्वितीय ब्याटिङ कौशल, अनगिन्ती कीर्तिमानहरू, र खेलप्रतिको समर्पणले उनलाई सधैं स्मरणीय बनाउनेछ।

उनको खेल जीवनको अनुभवबारे नेपाली खेलाडीले सिकाईका रुपमा ग्रहण गरे उदयीमान नेपालको नाम अझ प्रभावी हुने बताइन्छ। उनको नेपाल क्रिकेट संघ (क्यान)ले न्यानो स्वागत मात्र गरेको छैन, उच्च सम्मान पनि दिएको छ।