काठमाडौ - एमालेले माघदेखि तीनमहिने वडाकेन्द्रित अभियान सञ्चालन गर्ने भएको छ। दुई दिन चलेको एमालेको केन्द्रीय कार्यशालाले माघदेखि तीनमहिनेसम्म वडाकेन्द्रित अभियान सञ्चालन गर्ने घोषणा गरेको हो।
केन्द्रीय संगठन विभागको आयोजनामा आइतबार सम्पन्न ‘स्थानीय तहमा पार्टी कामका समस्या र समाधान’ विषयक राष्ट्रिय कार्यशालाले आगामी माघदेखि चैतसम्म निर्णायक राष्ट्रिय शक्ति निर्माणको लागि वडाकेन्द्रित अभियान सञ्चालन गर्ने घोषणा प्रस्ताव पारित गरेको हो।
यस्तै, कार्यशालाले आधारभूत तहसम्म कमिटी निर्माण गर्ने र सदस्यता विस्तार सँगसँगै ‘जनतासँग जनसंगठन अभियान’ सञ्चालन गर्ने प्रस्ताव पनि पारित गरेको केन्द्रीय सदस्य तथा संगठन विभाग सचिव माधव ढुंगेलले बताए।
आगामी फागुन चैतभित्रै सदस्यता नवीकरण सम्पन्न गर्ने, यस वर्षभित्रै सबै पार्टी सदस्यलाई अनलाइनमा ल्याउने प्रस्ताव पनि कार्यशालाले पास गरेको छ। पार्टी र नेतृत्वका विरुद्धका षड्यन्त्र र कुप्रचारको जमेर प्रतिवाद गर्दै पार्टी, नीति, नेतृत्व र राजनीतिक कार्यदिशालाई जनताबिच स्थापित गर्ने संकल्प प्रस्ताव पनि कार्यशालाले पास गरेको छ।
