काठमाडौं– सोमबार बिहानको राती १ बजे निधन भएका काठमाडौं महानगरपालिकाका पहिलो मेयर पीएल सिंहलाई सशस्त्र प्रहरी बलका पूर्वमहानिरिक्षक (आईजी) पुष्पराम केसीले सम्झिएका छन्। 

प्रहरी निरिक्षक रहँदा आफूलाई सिंहले दिएको धन्यवादपत्र राख्दै उनले भनेका छन्,‘काठमाडौं महानगरपालिकाका प्रथम मेयर तथा नगर रक्षकका परिकल्पनाकार आदरणीय पी.एल. सिंहज्यूको स्वर्गारोहणको दुःखद खबरले दुखि तुल्याएको छ।’

केसी अगाडि लेख्छन्,‘उहाँको नेतृत्व, समर्पण र समाजप्रतिको सेवा भावना मेरा लागि प्रेरणाको स्रोत रह्यो। म नगर रक्षकहरूको पहिलो टोलीको प्रशिक्षकको भूमिकामा रहंदाका बखत उहाँले सिकाउनुभएको मूल्य र दृष्टिकोणका साथै उहांबाट प्राप्त प्रोत्साहनले मेरो व्यक्तिगत तथा व्यावसायिक जीवनमा गहिरो प्रभाव पारेको छ।’

केसी सशस्त्र प्रहरी बलमा छोटो अवधिका लागि आईजी भए पनि सुधारका काममा सक्रिय रहेका थिए।