काठमाडौं– नेपाल भ्रमणमा आएका क्रिकेट लिजेन्ड ब्रायन लाराले सगरमाथा बेस क्याम्पको भ्रमण गरेका छन् । सोमबार बिहान सगरमाथालाई नजिकबाट देख्दा उत्साही बनेका उनी मंगलबार स्वदेश फर्केका छन् ।
ब्रायन सोमबार बिहान आफ्नी छोरी टिला लारालाई साथमा लिएर सिम्रिक एयरको हेलिकोप्टरबाट सगरमाथा बेस क्याम्पमा पुगेका थिए ।
ब्रायनले विश्वकै जोखिमपूर्ण मानिने लुक्ला एयरपोर्टलाई पनि चासोपूर्वक हेरेको र हिलारी एयरपोर्टमा स्थानीय फ्यानहरुलाई अटोग्राफ दिएको ब्रायनसँगै गएका सिद्धार्थ थापाले खबरहबलाई बताए । थापाले ब्रायनकी छोरीसँगै आफ्नी छोरी अमाया थापालाई पनि लगेका थिए ।
विश्वको सबैभन्दा अग्लो ठाउँमा पुगेर उत्साही बनेका ब्रायनले अमायालाई क्रिकेटको ब्याटमा हस्ताक्षर गरेर उपहार दिए ।
सगरमाथा क्षेत्रमा पुगेका ब्रायनले विभिन्न हिमालहरु हेलिकोप्टर चढेर नजिकैबाट अवलोकन गरे ।
काठमाडौंमा जारी नेपाल प्रिमियर लिग हेर्न र नेपाली खेलाडीहरुलाई हौसला दिन विश्व चर्चित क्रिकेटर ब्रायन गत शुक्रबार नेपाल आएका थिए।
