काठमाडौँ- संयुक्त ट्रेड युनियन समन्वय केन्द्र (जेटीयूसीसी) को अध्यक्षमा जगतबहादुर सिंखडा चयन भएका छन् ।
मंगलबार काठमाडौँमा आयोजित छैटौँ राष्ट्रिय ट्रेड युनियन सम्मेलनले सिंखडालाई एक वर्षको लागि जेटीयूसीसीको राष्ट्रिय अध्यक्ष चयन गरेको हो । धादिङका स्थायी बासिन्दा सिंखडा अखिल नेपाल ट्रेड युनियन महासंघका अध्यक्ष पनि हुन् ।
सम्मेलनले महासचिवमा इन्द्रदेव मिश्र र महिला संयोजकमा सीता लामालाई चयन गरेको छ । महिला समितिको सचिवमा सरिता घिसिङ चयन भएकी छन् ।
जेटीयूसीसीमा हाल नेपालमा मान्यता प्राप्त दश वटा ट्रेड युनियन महासंघ आबद्ध छन् । हरेक एकरएक वर्षमा हुने जेटीयूसीसीको अध्यक्षमा भने प्रत्येक वर्ष छुट्टाछुट्टै ट्रेड युनियन संस्थाले प्रतिनिधित्व गर्ने गरेका छन् ।
जेटीयूसीसीका नवनिर्वाचित अध्यक्ष जगत सिंखडाले ट्रेड युनियन आन्दोलन अप्ठ्यारो अवस्थामा रहेको बेला नेतृत्व गर्नु चुनौतीपूर्ण रहे पनि सशक्त नेतृत्व प्रदान गर्ने बताए ।
