काठमाडौ - फिल्म ‘कोशेढुंगा’ निर्माणको घोषणा गरिएको छ । फिल्म ‘पूर्ण बहादुरको सारङ्गी’का निर्देशक सरोज पौडेलले यो फिल्मको घोषणा गरेका हुन् । फिल्मको थिम पोस्टर सार्वजनिक गर्दै निर्माणको घोषणा गरिएको हो । थिम पोष्टरमा घुरमैलो बिहानीलाई पृष्ठभूमिमा राखेर पहाडलाई हेरिरहेकी एक महिलालाई देखाइएको छ ।
सामाजिक कथावस्तुमा निर्माण हुन लागेको यो फिल्मले अभाव, अग्लो सपना र संघर्षको कथा भन्नेछ । फिल्मको बिषयमा निर्देशक पौडेलले केही पनि बोलेका छैनन् । यो फिल्मलाई आउँदो बर्ष रिलिज गर्ने तयारी गरिएको छ ।
नरदेवी फिल्मस्को प्रस्तुति रहेको फिल्मलाई प्रेविल कँडेल र हरि महत्तको लगानी रहनेछ । फिल्मका कार्यकारी निर्माता दिनेश खड्का हुन् ।
बाबु श्रेष्ठको डीओपी रहने फिल्ममा सुरेन्द्र पौडेलको सम्पादन, रिदम कँडेल र आशिष अविरलको संगीत रहनेछ । फिल्मका कलाकारहरुको लाइनअप घोषणा गरिएको छैन ।
