काठमाडौँ- नेपाल क्रिकेट संघ (क्यान)को आयोजना आइतबारबाट सुरु भएको जय ट्रफि पुरुष एलिट कप क्रिकेटअन्तर्गत पहिला दुवै खेल ड्र भएको छ ।
जनकपुर र पर्सामा भएको नेपाल पुलिस क्लब र त्रिभुवन आर्मी क्लब तथा बागमती प्रदेश र मधेश प्रदेशबीचको खेल ‘ड्र’ मा सकिएको हो ।
पहिला दुवै खेल ‘ड्र’ मा सकिँदा बागमती प्रदेश शीर्ष स्थानमा छ । बागमतीले १५ अंक जोडेको छ । बागमतीले दुई पारीमा २४७ रन जोड्दा मधेशको १९ विकेट झारेको थियो ।
समान १५ अंकसहित मधेश प्रदेश दोस्रो र नेपाल पुलिस क्लब तेस्रो स्थानमा छ । मधेशले ३१३ रन जोड्दा बागमतीको १६ विकेट झार्न सफल भयो ।
पुलिसले आर्मीविरुद्ध २१३ रन जोड्दा २० विकेट हात पार्यो । १४ अंकसहित त्रिभुवन आर्मी क्लब चौथो स्थानमा छ । अंक तालिकाको पुछारमा रहेको आर्मीले दुई पारीमा २९६ रन जोड्दा १५ विकेट झार्यो ।
अब बुधबार र बिहीबार पर्सामा नेपाल पुलिस क्लब र मधेश प्रदेश तथा जनकपुरमा त्रिभुवन आर्मी क्लब र बागमती प्रदेशबिच प्रतिस्पर्धा हुनेछ ।
