काठमाडौ - महालक्ष्मी स्पोर्टस् हबद्धारा 'महालक्ष्मी फूटबल फेष्टिबल' आयोजना गरिएको छ ।
हबले ललितपुर स्पोर्टस् ट्रेनिङ्ग सेन्टर तथा फिरफिरे युवा क्लबसँगको सहकार्यमा महालक्ष्मी नगरपालिका ८, लुभूमा शनिबार 'महालक्ष्मी फूटबल फेष्टिबल'को आयोजना गरेको हो ।
'मेबाईलसँग होइन, साथीसँग खेल', भन्ने मूल नाराका साथ आयोजना गरिएको फेष्टिबलमा संस्थाद्धारा संचालित फुटबल ट्रेनिङ्गमा आवद्ध तथा विभिन्न उमेर समूहका स्थानिय बालबालिका तथा युवाहरुको सहभागिता रहेको थियो ।
बालबालिका तथा युवाहरुको फुटबलसँग सम्बन्धित शिपहरु जस्तै सुटिङ्ग, हेडिङ्ग, ड्रिबलिङ्ग, पासिङ्ग लगायतका शिपहरुको प्रदर्शनको आधारमा विजेता छनौट गरिएको थियो ।
सहभागी बालबालिकाहरुको बीचमा मनोरञ्जनात्मक मैत्रीपूर्ण फूटबल प्रतिश्पर्धा समेत आयोजना गरिएको थियो । सहभागि सबै बालबालिकालाई सहभागिताको प्रमाणपत्र प्रदान गरिएको थियो भने, विजेता टोलिलाई व्यक्तिगत मेडल तथा कप प्रदान गरिएको थियो ।
उक्त फेष्टिबलमा विशेष खेलको रुपमा क्रिकेटलाई समेत सहभागि गराई तीन टोलीको बीचमा प्रतिश्पर्धा गराईएको थियो ।
क्रिकेट प्रतियोगितामा जिल्ला क्रिकेट संघ ललितपुरको टीम विजयी घोषित भयो । महालक्ष्मी स्पोर्टस् हब खेलकुद तथा सामाजिक विकासमा लामो अनुभव बोकेका सामाजिक उद्यमीहरुद्धारा संचालित एक सामाजिक उद्यम हो ।
मोबाईलको अति प्रयोगबाट बालबालिका तथा युवाहरुमा परेको शारिरीक तथा मानसिक प्रभावलाई विभिन्न खेलकुदको माध्यमबाट कम गर्ने लक्ष्य संस्थाले लिएको छ जसको लागि संस्थाले नियमित तालिम, प्रतिश्पर्धा, लिग म्याचहरुको आयोजना, स्थानिय तथा उपत्यका बाहिरका विभिन्न एकेडेमीसँगको सहकार्यमा मैत्रीपूर्ण प्रतिश्पर्धा गर्दै जाने योजना बनाएको छ ।
