काठमाडौँ - नेपाल प्रहरीमा जनपद प्रहरी समूहतर्फका प्रहरी उपरीक्षक (एसपी) हरूलाई प्रहरी वरिष्ठ उपरीक्षक(एसएसपी) पदमा बढुवा गरिएको छ ।
आज बसेको बढुवा समितिको बैठकले गरेको निर्णयअनुसार प्रहरी नियमावली, २०७१ को नियम २७ को उप(नियम (४) अनुसार २५ जना प्रहरी उपरीक्षकहरूलाई प्रहरी वरिष्ठ उपरीक्षक पदमा बढुवाका लागि सिफारिस गरिएको हो।
बढुवा सूची अनुशार पहिलो नम्बरमा रमेश थापा रहेका छन् भने दोस्रो नम्बरमा अजय के.सी. रहेका छन् । त्यसैगरी तेस्रो नम्बरमा अनुपम शम्शेर ज.ब.रा., चौथो नम्बरमा बीर बहादुर बुढामगर र पाँचौमा नवराज अधिकारी रहेका छन् ।
निकै लामो रस्साकस्सीपछि गृह मन्त्रालयस्थित बढुवा समितिको सचिवालयले बढुवा प्रक्रिया टुंगो लगाएको छ। रिक्त दरबन्दीहरूमा लामो समयसम्म बढुवा नहुँदा करियर पथमा गम्भीर असर पर्ने भन्दै अधिकारीहरूले चिन्ता व्यक्त गर्दै आएका थिए। यसैक्रममा, गृह सचिव गोकर्णमणि दुवाडी र आईजीपी बसन्त बहादुर कुँवरले बढुवा प्रक्रिया ढिलाइ नगर्न बारम्बार जोड दिँदै यसलाई शीघ्र टुंग्याउने प्रयास गरेका थिए।
तर निकै ठूलो शक्ति संघर्षका कारण पार पाउन सकेको थिएन ।
जति धेरै समय लम्बियो, त्यति नै जटिल र असरकारी बनेको चौतर्फी दबाबका बीच सोमबार रातिसम्म बसेको बैठकले बढुवा प्रक्रिया टुंग्याएको छ। पछिल्ला दिनहरूमा को कति नम्बरमा पर्न सक्ने भन्ने विषयले बढुवा प्रक्रियालाई झन् पेचिलो बनाएको थियो।
