लस एन्जल्स – आगलागीमा परेर ओलम्पिक पदक नास भएपछि अमेरिकाका पौडीबाज गेरी हल जुनियरले ओलम्पिक पदकको नयाँ सेट नै पाउने भएका छन्।
अन्तर्राष्ट्रिय ओलम्पिक कमिटी (आइओसी)का अध्यक्ष थोमस ब्लाचले यस विषयमा जानकारी दिएका हुन्। घरमा आगो पसेपछि उनी कुकुर, मधुमेहका कारण प्रयोग गर्दै आएको इन्सुलिन र हजुरबाको फोटो लिएर हतारमा भागेका थिए। यसपछि उनी घरमा फर्कन नै असमर्थ रहे।
सन् १९९६ देखि २००४ को बीचमा उनले जितेका ५ ओलम्पिक स्वर्ण पदकका साथमा तीन रजत तथा दुई कास्य पदक पनि त्यही छुटेको थियो। अहिले पनि बलिरहेको आगोमा इटनमा ३३ प्रतिशत नियन्त्रणमा रहेको जनाइएको छ।
सान्टा आनाको आगोको तप्का अझ गइरहेको छ। राष्ट्रिय मौसम विभागका अनुसार बुधबार बिहानसम्म अझ जटिल अवस्था आउन सक्छ। बुधबारसम्मका लागि सावधान रहन चेतावनी दिइएको छ।
मंगलबार पिकमा पुग्ने अनुमान गरिएको सो हुरीको गति ११२ किलोमिटर प्रतिघण्टा रहने छ। सुख्खा तथा कम आर्द्रता भएका कारण सो हुरीले आगोलाई अझ तेज गतिमा फैलाउने सम्भावना छ।
