काठमाडौँ- प्रधानमन्त्री कप (पीएम) महिला राष्ट्रिय क्रिकेट प्रतियोगितामा सुदूरपश्चिम प्रदेशले विजयी सुरुआत गरेको छ ।
धनगढीको फाप्ला क्रिकेट मैदानमा आजदेखि सुरु प्रतियोगिताको पहिलो खेलमा सुदूरपश्चिमले गण्डकी प्रदेशलाई ७ विकेटले पराजित गरेको हो ।
सुदूरपश्चिमकी ओपनर रेवती धामीले सर्वाधिक २१ रन जोडिन् । २७ बल खेलेकी उनले २ चौका प्रहार गरिन् । मनीषा बोहरा ९, कप्तान विन्दु रावल ६, कविता कुँवर ८ रनमा आउट हुँदा शोभा रोकाय ४ रनमा अविजित रहिन् ।
बलिङमा गण्डकीकी आकृति तिवारी र अपेक्षा बुढाथोकीले एक/एक विकेट लिए ।
त्यसअघि पहिला ब्याटिङ गरेको गण्डकीले निर्धारित १५ ओभरमा ७ विकेट गुमाएर ५५ रन जोडेको थियो । गण्डकीकी रेखा तामाङले सर्वाधिक १३ रन बनाएकी थिइन् । सृजना पौडेलले १० रनको योगदान दिँदा अन्य ब्याटरले दोहोरो अंकमा रन बनाउन सकेका थिएनन् ।
बलिङमा सुदूरपश्चिमका रेखा धामीले ४, जानकी थापा र रितु कनोजियाले एक-एक विकेट लिएका थिए । खराब मौसमका खेल सुरु हुन ढिलाइ भएपछि खेल १५ ओभरमा झारिएको थियो ।
