काठमाडौं– सामाजिक सञ्जालका विभिन्न फोरममा भाइरल बनिरहेको प्रहरीले एक युवकलाई निर्घात कुटपिट गरेको भिडिओ चितवनको भरतपुरस्थित बसेनीको रहेको खुलेको छ।

गएको महिनाको १५ पुसमा रातीको समयमा प्रहरीका सहायक निरिक्षक (असई) बुद्धिबहादुर घर्ती भुजेलले एक युवकलाई लात्ताले हानेर लडेपछि फेरि बुटै बुटले बजारेका छन्।

उक्त भिडिओ सार्वजनिक भएपछि जिल्ला प्रहरी कार्यालय चितवनले छानबिन समिति गठन गरेको छ। समितिको सिफारिसका आधारमा असई भुजेललाई निलम्बन गर्न लागिएको जिल्ला प्रहरी कार्यालय चितवनले जनाएको छ। 

‘भिडिओ हेर्दा प्रहरी आचरणविपरीत कार्य गरेको देखिएको छ। घटनामा संलग्न प्रहरी कर्मचारीलाई कारबाही प्रक्रिया बढेको छ’, प्रहरी प्रधान कार्यालयले भन्यो।

जिल्ला प्रहरी कार्यालय चितवनका प्रमुख एवं एसपी गौमत मिश्रले भिडिओ चितवनकै भएको पुष्टि गर्दै पुस १५ गते रातीको भिडिओ भएको जनाएका छन्।

भरतपुर महानगरपालिका–११, बसेनीको भिडिओ रहेको र  सम्बन्धित प्रहरी कर्मचारीलाई निलम्बनको प्रक्रिया थालिसकेको चितवन प्रहरीले जनायो। 
एसपी मिश्रका अनुसार, बसेनी अस्थायी प्रहरी बिटका प्रमुख समेत असई बुद्धिबहादुर घर्ती भुजेलले ती व्यक्तिमाथि कुटपिट गरेका हुन्।