काठमाडौं– प्रधानमन्त्री केपी शर्मा ओलीले प्रमुख प्रतिपक्षी नेकपा माओवादी केन्द्रलगायतलाई इङ्गीत गर्दै सरकार नढल्ने दाबी गरेका छन्। 

शुक्रबार प्रतिनिधि सभाको हिउँदे अधिवेशनलाई सम्बोधनका क्रममा भने,‘बिहानै साँझ, सरकार ढल्यो भनेको छ। एउटा ढलें ढलें भन्ने गीत छ नि त्यस्तै। राजनीतिमा यस्तो सुहाउँदैन।’

ओलीले थप जोडे,‘एक जना माननीयले यो गीत पनि श्लील छैन भन्नुभएको थियो। त्यस्तै, राजनीतिमा पनि यस्ता खाले चिज सुहाउँदैन।’

ओलीले प्रतिपक्षीको संसद भन्ने भाष्यको पनि खण्डन गरेका थिए।

ओलीले भने,‘हामी सबैको संसद हो। सरकारले बिजनेश ल्याउने हो। सबैले बोल्ने थलो हो।’

ओलीले विभिन्न नेताले हावादारी हल्ला गरेको पनि बताए। उनले दाबी गर्दै भने,‘म यहाँ उभिएर भन्छु, भ्रष्टाचार गर्दिन। गर्न दिन्न। र, कसैले गरेको प्रमाणित गरेर लेर आउन चुनौती दिन्छु।’

उनले कम्बोडियाको टेलिकमलगायतका विषयमा लगानी भएको भन्ने विषयलाई राख्दै यस्तो बताएका थिए।