काठमाडौँ - राष्ट्रपति डोनाल्ड ट्रम्पले सत्ता सम्हालेपछि अमेरिकी प्रशासनले निरन्तर नयाँ आदेश जारी गरिरहेको छ । अब ट्रम्प प्रशासनले अमेरिकी अन्तर्राष्ट्रिय विकास एजेन्सी (युएसएड) बन्द गर्ने तयारी गरेको छ । अमेरिकी सरकार दक्षता विभागका प्रमुख तथा टेस्लाका सीईओ एलन मस्कले अन्तर्राष्ट्रिय विकास एजेन्सी अब बन्द हुने संघारमा रहेको बताएका छन् । मस्कले युएसएडलाई बन्द गर्ने विषयमा राष्ट्रपति ट्रम्प सकरात्मक रहेको बताएका हुन् ।
संयुक्त राज्य अमेरिकाको अन्तर्राष्ट्रिय विकास एजेन्सी (युएसएड) संयुक्त राज्य अमेरिका सरकारको एक स्वतन्त्र एजेन्सी हो । यो १९६१ मा तत्कालीन राष्ट्रपति जोन एफ केनेडीद्वारा स्थापित भएको थियो । यो एजेन्सीले नागरिक वैदेशिक सहायता र विकास सहायताको प्रशासनको निरीक्षण गर्दछ । यस संस्थाको उद्देश्य विश्वव्यापी स्वास्थ्य, आर्थिक विकास, प्रकोप र लोकतान्त्रिक सुधारका मुद्दाहरूमा काम गर्नु हो । यो एजेन्सी हाल १०० भन्दा बढी देशहरूमा सञ्चालनमा छ । यस एजेन्सीले विश्वव्यापी रूपमा मानवीय संकटहरूलाई कम गर्न मद्दत गरेर प्रायः अमेरिकी विदेश नीतिलाई अगाडि बढाउने गर्दछ । २०२३ मा युएसएडले ४० बिलियन डलर बजेट खर्च गरेको थियो ।
हालै, अमेरिकी विदेश विभागले सबै विदेशी कोषमा प्रतिबन्ध लगाउने निर्णय गरेपछि एजेन्सीलाई ठूलो धक्का लागेको थियो । कोष रोकिएको समयमा, अमेरिकी विदेश विभागले कुन अमेरिकी सहायता र विकास कार्यक्रमहरू जारी राख्न सकिन्छ भन्ने कुराको समीक्षा गर्नेछ । यस आदेश पछि, अन्तर्राष्ट्रिय विकास एजेन्सीका धेरै मानवीय, विकास र सुरक्षा कार्यक्रमहरू बन्द गरिएको छ । यसले गर्दा सहायता संस्थाहरूबाट हजारौं मानिसहरूको जागिरबाट निकालिएको छ । कर्मचारीहरूलाई बिदा र बिदाको लागि आदेश दिइएको छ । अहिले ९० दिनका लागि भनिएपनि मस्क नेतृत्वको अमेरिकी सरकार दक्षता विभागले युएएडमा हुने फजुल खर्चको अध्ययन गरिरहेको र यस संस्थालाई सधैका लागि बन्द गर्न राष्ट्रपतिसँग छलफलमा रहेको मिडिया रिपोर्टमा उल्लेख छ ।
ट्रम्प प्रशासनले एजेन्सीको ठूलो खर्च अमेरिकाको लागि राम्रो नभएको विश्वास गरेकोले एजेन्सी बन्द गर्ने तर्क गरिरहेका छन् । मस्कले सामाजिक सञ्जाल एक्समा युएसएडको बारेमा कुरा गर्दै यो किरा भएको स्याउ होइन, किराहरूको डल्लो भएको टिप्पणी गरेका छन् । मस्कले यो मर्मत गर्न नसकिने अवस्थामा रहेकाले यसलाई बन्द गर्नुपर्ने बताएका छन् ।
मस्कले युएसएडलाई आपराधिक संस्था भन्दै यसको अन्त्य गर्ने समय आएको बताएका छन् । त्यस्तै राष्ट्रपति ट्रम्पले पनि युएसएडको बारेमा टिप्पणी गर्दै यो एजेन्सी कट्टरपन्थी पागलहरूको समूहले चलाएको बताउदै उनीहरुलाई निकाल्दै गरेको बताएका थिए ।
ट्रम्प प्रशासनले आइतबार मात्र युसएडका दुई शीर्ष सुरक्षा प्रमुखहरूलाई बिदामा पठाएको छ । यी अधिकारीहरूले टेस्लाका सीईओ मस्क नेतृत्वको दक्षता बिभागलाई प्रतिबन्धित क्षेत्रहरूमा संवेदनशील वर्गीकृत जानकारी दिन अस्वीकार गरेकाले शिर्ष अधिकारीलाई बिदामा पठाएको थियो । दक्षता विभागले सामाजिक सुरक्षा र मेडिकेयर ग्राहक भुक्तानी प्रणालीहरू सहित संवेदनशील वित्तीय डेटामा पहुँच प्राप्त गरेको थियो । यसमा गुप्तचर प्रतिवेदनहरू पनि समावेश रहेका छन् । तर, पहिले उनको टोलीसँग त्यो जानकारी पहुँच गर्न आवश्यक सुरक्षा क्लियरेन्स थिएन । त्यसैले युएसएडका सुरक्षा अधिकारीहरू जोन भोर्हिस र डेपुटी ब्रायन म्याकगिलले कानुनी रूपमा जानकारी दिन अस्वीकार गरेका थिए । यसपछि, युएसएडको वेबसाइट पनि बन्द गरिएको थियो ।
