काठमाडौँ- पोखरामा जारी २४औँ आहारारा पोखरा गोल्डकपमा विभागीय टिम एपीएफलाई स्तब्ध पार्दै मछिन्द्र क्लब क्वाटरफाइनलमा प्रवेश गरेको छ । जारी संस्करणको बुधबार भएको खेलमा मछिन्द्रले एपीएफमाथि २-० को सानदार जित निकालेको हो ।
मछिन्द्रको जितमा आदित्य शाक्य र स्टेफन कामाहाले १/१ गोलको योगदान गरे । खेलको ७४औँ मिनेटमा मछिन्द्रका आदित्य शाक्यले गोल गर्दै टिमलाई अग्रता दिलाए । उनले आयुष घलानले मैदानको सेन्टर भागबाट उपलब्ध गराएको पासलाई सदुपयोग गर्दै सफल उत्कृष्ट फिनिसिङ गरे ।
पेनाल्टी बक्समा पुर्याएर एपीएफका दुई खेलाडीलाई छलाउँदै बक्स भित्रबाट उत्कृष्ट गोल गरेका उनी दोस्रो हाफमा मैदान प्रवेश गरेका आदित्यले आफूलाई प्रमाणित गरेका छन् ।
त्यस्तै, खेलको ८१औँ मिनेटमा मछिन्द्रका विदेशी खेलाडी स्टेफन कामाहाले व्यक्तिगत पहिलो र टिमका लागि दोस्रो गोल गर्दै अग्रता दोब्बर बनाए । खेलको करिब अन्तिममा २ गोल गरेपछि मछिन्द्रले एपीएफलाई दबाब बढाएको थियो ।
कामाहले देवेन्द्र तामाङले हानेको फ्रिकिकमा हेड मार्फत गोल गरे । एपीएफका किपर बल रोक्न अघि बढे पनि उनले कुनै अवसर नै पाएनन् ।
२०७८ को सेमिफाइनलमा एपीएफले मछिन्द्रलाई हराएको थियो । अहिले मछिन्द्रले त्यसको बदला लिएको छ । अब सेमिफाइनल पुग्न मछिन्द्रले अब थ्री स्टार क्लबसँग खेल्नेछ ।
