प्रहरी हवल्दारसँग थियो सम्बन्ध, १७ बर्षिया किशोरी चार महिनादेखि किन बेपत्ता भइन्?

काठमाडौं– बैतडीको महाकाली प्रहरी चौकीका हवल्दार कृष्णराज जोशीसँग प्रेम सम्बन्धमा रहेकी एक जना १७ बर्षिया किशोरी चार महिनादेखि बेपत्ता छिन्। उनको अवस्था प्रहरीले पनि पत्ता लगाउन नसकेको परिवारले जनाएका छन्। 

असोज २५ गते बिहानदेखि बेपत्ता बैतडी पञ्चेश्वर गाउँपालिका– २ डिम्मरकी १७ वर्षीया किशोरीको अवस्था प्रहरीको केन्द्रीय अनुसन्धान ब्यूरो (सीआईबी)को टोलीले पनि पत्ता लगाउन सकेको छैन। 

अनुसन्धानका लागि बैतडी पुगेको सीआईबी टोली फर्किएको छ।

करिब एक सातासम्म अनुसन्धान गर्दा पनि घटना नसुल्झिएपछि अहिले केन्द्रबाटै उक्त टोलीले घटनासँग सम्बन्धित तथ्य र प्रमाणका विषयमा अनुसन्धान गरिरहेको छ।

जिल्ला प्रहरी कार्यालय बैतडीले पनि अनुसन्धान जारी राखेको छ।

किशोरी बिहान पानी लिन भनी नजिकैको धारातर्फ गएकी थिइन्। उनको ग्यालिन र डोरी भेटिएको छ। 

हवल्दार कृष्णराज जोशीमाथि किशोरी बेपत्ताको आरोप लागेपछि असोज २५ गते भागेर महाकालीपारि भारतको सुगरखाल पुगेका बेला स्थानीयले नियन्त्रणमा लिएर प्रहरीलाई जिम्मा लगाएका थिए। 

उनी अहिले पूर्वपक्षका लागि थुनामा छन्। उनीबारे अनुसन्धान भइरहेको प्रहरीले जनाएको छ। 

किशोरीको परिवारले जोशीविरुद्ध व्यक्ति बेपत्ता पार्ने कसुरमा किटानी जाहेरी दिएपछि उनी पक्राउ परेका हुन्।

बेपत्ता भएकी किशोरीसँग प्रहरी हबलदार जोशीको सम्पर्क रहेकाले उनले नै बेपत्ता पारेको आफन्तले आरोप लगाएका छन्।

उनले प्रहरीलाई दिएको बयानमा बिहान आफूसँग भेट भएको बताएका छन्। त्यसपछि आफूलाई जानकारी नभएको उनको भनाइ छ।

हवल्दार र आफ्नो सम्बन्ध परिवारले थाहा पाएको भन्दै किशोरीले सुनाएकी थिइन्। त्यसमा हवल्दार जोशीले ‘अहिले म केही गर्न सक्दिनँ २–४ दिन रोक, केही गरौँला’ भन्ने जवाफ दिएको बयान छ।

पानी पँधेरो एउटै ठाउँमा गर्ने र चौकी नजिकै घर हुँदा चिनजान भएको हवल्दार जोशीले प्रहरीसमक्ष बताएका छन् तर स्थानीयले भने किशोरी बेपत्तामा हबलदारको संलग्नता रहेको आरोप लगाएका छन्।

उनीहरुबीचको निकटता झल्काउने गरी उनको मोबाइलमा ती किशोरी र उनका संयुक्त तस्बिर भेटिएका छन्।