काठमाडौं - काठमाडौंको शंखरापुर नगरपालिका–५ मा चाबहिलको मैजुबहालस्थित सत्य साई एकेडेमीले आफ्ना विद्यार्थीलाई वनभोज लगेको थियो । कात्तिकेमा रमाइलो गरेर फर्किएका विद्यार्थी सवार बस बीचबाटोमै दुर्घटनामा पर्यो ।
यो समाचार तयार पार्दासम्म तीन जनाको मृत्यु भएको छ । ४० जना घाइते छन् । प्रहरी प्रभाग सााँखुका अनुसार विभिन्न अस्पतालमा घाइतेको उपचार भइरहेको छ ।
दुर्घटनापछि सिंगो विद्यालय परिवार नै शोकमा डुबेको छ । अभिभावकहरूले प्रिन्सिपल लिम्बुलाई फोन गरेर आफ्नो बालबालिकाको स्थितिबारे जानकारी लिइरहेका छन् ।
शंखरापुर नगरपालिकाका प्रमुख रमेश नापितका अनुसार पिकनिक आएको बस दुर्घटनामा परेको हो । ‘पिकनिक आएको रहेछ । पिक्निक सकिएर फर्किने क्रममा दुर्घटना भएको हो,’ उनले भने ।
प्रहरीका अनुसार दुर्घटनाको कारण खुलेको छैन । सो क्षेत्रको बाटो पनि साँघुरो छ । प्रहरीले चालकलाई प्रहरीले नियन्त्रणमा लिएको छ ।
दुर्घटनामा ज्यान गुमाउने तीन जना विद्यार्थीको सनाखत भएको छ । मृत्यु हुनेमा मोरङको उर्लाबारी नगरपालिका–७ स्थायी घर भई काठमाडौंको कपन बस्ने ११ वर्षीय क्रिशल पुरी, सिन्धुपाल्चोकको बलेफी गाउँपालिका–७ घर भई चाबहिल बस्ने २४ वर्षीय सुरेश तामाङ र सिन्धुपाल्चोक घर भइ हाल काठमाडौंको भिमसेनगोला बस्ने १४ वर्षीया शुशांका डोटेल रहेका छन् ।
क्रिशलको त्रिवि शिक्षण अस्पतल–महाराजगञ्ज, सुरेशको नेपाल मेडिकल कलेज र शुशांकाको शंखरापुर अस्पतालमा मृत घोषणा गरिएको प्रहरीले जनाएको छ ।
