श्रमजीवी पत्रकार संघले २७५ सांसदलाई यस्तो के पठायो नि!

काठमाडौं– राष्ट्रिय सभामा छलफलका क्रममा रहेको सामाजिक सञ्जाल विधयेकविरुद्ध आवाज उठाउनका लागि श्रमजीवि पत्रकार संघ नेपालले २७५ सांसदलाई सदनमा आवाज उठाउन सन्देश पठाएको छ। 

संघका अध्यक्ष जन्मदेव जैशीका अनुसार प्रतिनिधि सभामा यो विधेयक पुग्यो भने पास नगराउनका लागि सांसदका मोबाइलमा सन्देश पठाइएको हो। 

‘माननीयज्यू नमस्ते ! सामाजिक सञ्जाल र मिडिया काउन्सिल विधेयकमा प्रेस तथा अभिव्यक्ति स्वतन्त्रता विरोधी बुँदा हटाउन, सरकारी सञ्चार निकायहरू प्रभावकारी बनाउन र श्रमजीवी पत्रकारको पारिश्रमिक वृद्धिका लागि सदनमा आवाज उठाइदिनु हुन अनुरोध गर्दछौं,’ संघले सोमबार सांसदहरूलाई पठाएको सन्देशमा भनिएको छ।

सामाजिक सञ्जाल र मिडिया काउन्सिल विधेयकमा उल्लेखित प्रेस तथा अभिव्यक्ति स्वतन्त्रता विरोधी बुँदा हटाउन, सरकारी सञ्चार निकायहरू प्रभावकारी बनाउन र श्रमजीवी पत्रकारको पारिश्रमिक वृद्धिका लागि पहल गर्न आग्रहसहितको सन्देश जिल्लाबाट प्रदेश सांसदहरूलाई पनि मोबाइलबाट पठाइएको छ।

‘नियन्त्रणमुखि विधयेकले प्रेस स्वतन्त्रता खण्डित गर्छ’, जैशीले क्यानडा नेपालसँग भने,‘यसैकारण सांसदलाई सन्देश पठाइएको हो। यसबाहेकका कार्यक्रम पनि गर्नेछौं।’