‘लाज शरणम्’ माथि रोक लगाएकोमा चौतर्फी आलोचना, निर्देशक समाज बोल्यो

काठमाडौँ- उच्च अदालत पाटनले प्रदर्शनको तयारीमा रहेको फिल्म ‘लाज शरणम्’को प्रचारमा लगाएको रोक प्रति चलचित्र निर्देशक समाजले आफ्नो गम्भिर ध्यानाकर्षण भएको जनाएको छ ।

समाजले बुधबार एक विज्ञप्ति जारी गर्दै चलचित्र ‘लाज शरणम्’को नाममा अदालतबाट जारी भएको बन्देजले चलचित्रको करोडौँको लगानी जोखिम र सृजनशील सर्जकलाई राम्ररी झस्काएको समेत बताएको छ ।

चलचित्र अभिव्यक्तिको माध्यम भएको र चलचित्रले समाजका विभिन्न पात्र र प्रवृत्तिलाई लिएर कथानक स्वरूप दिने परम्परा सर्वविदितै छ’, समाजले अगाडि भनेको छ ‘यसरी बनेको कथाले कुनै व्यक्ति वा समुदायका व्यक्तित्व, संस्कार र संस्कृतिलाई आघात पुर्‍यायो कि पुर्‍याएन भनेर जाँच गर्ने चलचित्र विकास बोर्ड र चलचित्र जाँच समिति आदी सरकारी निकाय अस्तित्वमा छ ।’  कुनै चलचित्रले व्यक्ति वा समुदायको मान मर्दन गर्छ भने जाँच पास समितिसँग प्रदर्शन रोक्ने अधिकार निहित भएको समेत समाजका अध्यक्ष जानदीप पराजुलीद्वारा जारी विज्ञप्तिमा गरिएको छ । 

समाजले ‘लाज शरणम्’ जस्तो कानुनी लडाइमा रहेको सबै चलचित्रलाई साथ र सहयोगका लागि चलचित्र सम्बन्धित सबै संघ संस्थालाई गोलबद्ध हुन आग्रह समेत गरेको छ ।