काठमाडौं– नेपाली कांग्रेसको १५औं महाधिवेशनको ‘काउन्ट डाउन’ शेरबहादुर देउवाले सभापति निर्वाचित भएदेखि नै गर्न सुरु भयो। खासगरी संस्थापनइतर रहेका नेता डा. शेखर कोइराला यो अभियानमा सक्रिय रहेका थिए। 

अब लगभग महाधिवेशनको मिति नजिकिँदै जाँदा विभिन्न समूह, गुट र उपगुटका चलखेल सुरु हुन थालेका छन्। एक हिसाबले नेपाली कांग्रेसको नेतृत्वपंक्ति आन्तरिक महाधिवेशनका निम्ति चलायमान भएका छन्। 

प्रदेश, जिल्ला, क्षेत्रीय समिति, निर्वाचन समिति र पालिका सभापतिसम्मका छलफल र महाधिवेशनका सन्दर्भमा अवधारणा लिने र बताउने क्रम पनि जारी छन्। 

तर यी सबै चहलपहलमा एउटा प्रश्न अहिले पनि निक्र्यौलताको भूँमरीमा छ– १५औं महाधिवेशन कहिले? 

महामन्त्री गगन थापा भन्छन्,‘तोकिएको मितिमा नै महाधिवेशन हुनेछ।’

तर केन्द्रीय सत्ता राजनीतिको समीकरण र गतिविधिले कांग्रेसले त्यो समयमा महाधिवेशन सम्पन्न गर्नेमा शंका छ। ‘शंकाको कुरा होइन यहि गठबन्धन कायम रहे हुन सक्तैन’, संस्थापननजिकका एक नेता भन्छन्,‘धकेलिने सम्भावना बलियो छ।’

विभिन्न पक्षबाट धारणा आउनेक्रम जारी रहँदा सभापति शेरबहादुर देउवाले भने,‘सकभर तोकिएको मितिमा नै हुनेछ’ भन्दा केही पनि भनेका छैनन्। 

तर यसमा पनि जटिलता कायम छ। नेकपा एमालेका अध्यक्ष तथा हालका प्रधानमन्त्री केपी शर्मा ओलीसँगको सहमतिका आधारमा ०८३ सालको असार मध्यसम्म देउवा प्रधानमन्त्री बन्ने छैनन्। यसकारण आफू संसदीय दलको नेता कायम रहेका बेला नै प्रधानमन्त्री बन्ने लक्ष्यमा रहेका देउवा महाधिवेशन ०८३ को मंसिरसम्म धकेल्न चहान्छन्। 

तर महामन्त्री विश्वप्रकाश शर्माले ०८३ को बैशाखपछाडि धकेल्न नहुने प्रस्ताव गरेका छन्। ०८२ को मंसिरमा नै हुनुपर्ने महाधिवेशन कम्तिमा ६ महिनाभन्दा बढी धकेल्न नहुने लुम्बिनीमा भएको क्षेत्रीय सभापति र पोखरामा भएको जिल्ला सभापतिको भेलामा प्रस्ताव भएको उच्च स्रोतले जनाएको छ।

कांग्रेसले विधानअनुसार नै सभापतिलाई शक्तिशाली बनाएको छ। यसकारण उनको चाहना र अडानबिना मिति तय हुने सम्भावना न्यून रहेको मान्नेहरु पनि छन्। 

शेखर कोइराला समयमा नै महाधिवेशन हुनुपर्ने जिकिरसाथ देश दौडाहामा छन् तर अथाह शक्ति भएका सभापतिको चाहनाविपरित हुने सम्भावना नै छैन। 

‘यसमा सभापतिको राय के हो? उहाँले कहिले प्रस्ताव गर्नुहुन्छ। कानुनी र विधानका समस्या के छन्? ति गाँठा कसरी फुकाएर जाने भन्ने विषयले पनि अर्थ राख्छ’, एक नेता भन्छन्,‘त्यहाँमाथि केन्द्रीय समितिमा नै बलियो रहेका सभापतिबाहेकले यहि दिन गर्छु भनेर हुने पनि होइन।’