काठमाडौँ- नेकपा एकीकृत समाजवादीले गणतन्त्रका विरुद्धमा हुने जुनसुकै गतिविधिको विरोधमा उभिने बताएको छ ।

पार्टीको तर्फबाट प्रतिनिधिसभा बैठकमा समय लिएर बोल्दै वरिष्ठ उपाध्यक्ष राजेन्द्रप्रसाद पाण्डेले यस्तो बताएका हुन् ।

‘म र हाम्रो पार्टीको तर्फबाट यति भन्न चाहन्छु, हामी संघीय लोकतान्त्रिक गणतन्त्रको पक्षमा पूर्ण प्रतिबद्ध पार्टी हो,’ पाण्डेले भने, ‘यसका विरुद्ध हुने सम्पूर्ण गतिविधिका विरुद्ध हामी हुनेछौँ । हामीले रगतसँग साटेर गणतन्त्र ल्याएको हो । कसैले बक्सिस दिएको होइन ।’

उनले गत २५ फागुनमा काठमाडौंमा भएको राजावादीहरूको प्रदर्शनमा भारतको उत्तर प्रदेशका मुख्यमन्त्रीको तस्बिर देखिनु संयोग वा इच्छा के हो ? भन्दै प्रश्न गरे ।

‘ब्यानरमा राजसंस्था पुनर्स्थापना गर्छौँ भनेर लेखेको पनि देखियो । उत्तर प्रदेशका मुख्यमन्त्रीको फोटो देखिनु संयोग हो वा उहाँकै इच्छा हो ? यो अवस्थाले देशमा गम्भीर अवस्था सिर्जना हुन लागेको जस्तो देखियो,’ उनले भने ।