काठमाडौं- प्रधानमन्त्री केपी शर्मा ओलीले विदेशिने नाममा गलत बाटो रोज्नु राम्रो नहुने बताएका छन् ।
बिहीबार बसेको प्रतिनिधिसभाको बैठकमा सांसदहरूसँगको प्रत्यक्ष प्रश्नोत्तरका क्रममा उनले नेकपा एमालेकी सांसद भगवती चौधरीको प्रश्नको जवाफ दिने क्रमा यस्तो बताएका हुन् ।
‘ठूलो संख्यमा बाहिर जाने भन्ने प्रश्न छ, खेत छ उत्पादन गर्न छाडेर बाहिर जानु, तल्लो बाटो भएर अमेरिका जानु र निष्कासित भएर आउनु उचित होइन’, उनले भने, ‘चेतनाको कमी छ, चेतना वृद्धि गर्न जरुरी छ । केही पनि भएन भन्ने भाष्य बनाउन खोजिएको छ, त्यसले कलिलो मस्तिष्कमा निराशा भाव फैलिएको छ ।’
ओलीले अहिले संसार ‘ग्लोबल भिलेज’ बनेको बताउँदै व्यवसाय, रोजगारी र अध्ययनका लागि जतिसुकै विकसित र धनी देशका नागरिक पनि आफ्नो रुचिअनुसार विदेश जाने सिलसिला विश्वव्यापी रुपमा देखिएको बताए ।
‘देशबाट युवा बाहिरिएको कुरालाई पूरै नकारात्मक रुपमा बुझ्नु हुँदैन । व्यक्तिगत रुपमा विदेश जानुलाई गौरवको विषय ठान्ने र सामाजिक रुपमा भने त्यसलाई नकारात्मक भाष्यमा बुझ्ने दोहोरो चरित्रका कारण नकारात्मक सन्देश गएको छ’, उनले भने, ‘हिजो जीवन निर्वाहका लागि सीमित विकल्प थिए, आज अनेक विकल्प छन् । संसारको जुनसुकै कुनामा जान सक्ने छनौटको लाभ हाम्रा युवाले पनि लिएका छन् ।’
उनले युवाहरूलाई स्वदेशमै उद्यमशीलता र रोजगारीको अवसर सिर्जना गर्ने कुरामा सरकारले काम गरिरहेको पनि बताए । मुलुकमा औद्योगिक लगानीको वातावरण सुधार गरी लगानीमैत्री बनाउन, स्वदेशी लगानीलाई प्रोत्साहन गर्दै विदेशी लगानी आकर्षित गर्न, उत्पादन र उत्पादकत्व बढाउँदै रोजगारी सिर्जना गर्ने काममा सरकार लागेको उनले बताए ।
ओलीले आयात व्यवस्थापन र निर्यात प्रवर्द्धनमार्फत् व्यापार घाटा न्यूनीकरण गर्न विभिन्न नीतिगत एवं कानूनी सुधारका साथै व्यवसायमैत्री कानुन बनाइएको पनि जिकिर गरे ।
