ज्ञानेन्द्र शाहलाई पक्राउ गरिए के सम्म होला? नवराज सुवेदीले ‘नजरबन्द’बाट दिए यस्तो चेतावनी

काठमाडौँ– शुक्रबार रातीबाट प्रहरीको नजरबन्दमा रहेका ‘राजसंस्था पुनस्र्थापनाका लागि संयुक्त जनआन्दोलन समिति’का संयोजक नवराज सुवेदीले ज्ञानेन्द्र शाहलाइ पक्राउ गरेको खण्डमा भयावह अवस्था हुन सक्ने संकेतसहित चेतावनी दिएका छन्।

शनिबार उनले विज्ञप्ति जारी गरी ज्ञानेन्द्रलाई समेत बदनाम गराउने र घटनामा संलग्नता देखाउने उद्देश्यले नजरबन्द गर्ने वा पक्राउ गर्ने भन्ने तयारी भइरहेको समाचारहरू बाहिर आएकाले त्यस अनुरूप कदम चाल्ने प्रयास भएमा देशभरबाट आम नागरिकहरू स्वतःस्फूर्त विरोधमा उत्रने चेतावनी दिएका हुन्। 

काठमाडौँको तीनकुनेमा आयोजना गरिएको आन्दोलन घोषणा सभामा  सङ्घर्ष समितिका पदाधिकारी, केन्द्रीय नेताहरू मञ्चमा पुगेर सभालाई सम्बोधन गर्न नपाउँदै सरकार पक्षबाट नियोजित  घुसपैठ गराइएको दाबी गरेका सुवेदीले आन्दोलनका कमान्डर दुर्गा प्रसाईँ लगायतलाई पक्राउ पुर्जी जारी गर्ने, कार्यक्रम पश्चात् जनआन्दोलन समितिका सदस्य सचिव रवीन्द्र मिश्र, आन्दोलन परिचालन संयोजक धवल शमशेर राणा तथा प्रवक्ता अधिवक्ता स्वागत नेपाल लगायतलाई पक्राउ गर्ने र आफूलाईसमेत घरमै नजरबन्दमा राख्ने कार्य भएको उल्लेख गरेका छन्।