टी-२० छोडेपनि रोहित, विराट र जडेजा ए प्लस सम्झौतामै रहने !

काठमाडौँ - भारतीय क्रिकेट टिमका स्टार क्रिकेटर विराट कोहली र रोहित शर्मा भारतीय क्रिकेट कन्ट्रोल बोर्ड (बीसीसीआई) को केन्द्रीय सम्झौतामा ए प्लस ग्रेडमा रहनेछन् । मिडिया रिपोर्टका अनुसार बोर्डले टी-२० बाट सन्यास लिएपनि दुवै खेलाडीलाई ए प्लस ग्रेडमा राख्ने भएको छ । 

त्यस्तै राष्ट्रिय टिमबाट टी-२० क्रिकेट छोडेका रविन्द्र जडेजा र तिब्र गतिका बलर जसप्रित बुमराह पनि ए प्लसमै रहने छन् । यो ग्रेडमा रहेका खेलाडीले वार्षिक ७ करोड रुपैयाँ पाउनेछन् ।  

त्यस्तै मिडिया रिपोर्टका अनुसार भारतका नम्बर ४ स्थानमा ब्याटिंग गर्ने ब्याट्सम्यान श्रेयस अय्यर केन्द्रीय सम्झौतामा पुनरागमन हुने निश्चित प्राय रहेको छ । यसअघि उनलाई केही घरेलु खेल नखेलेका कारण केन्द्रीय सम्झौताबाट हटाइएको थियो ।

अय्यरले च्याम्पियन्स ट्रफीमा लगभग ४९ को औसतमा रन बनाएका थिए । अय्यरले च्याम्पियन्स ट्रफी २०२५ को ५ इनिङमा ७९.४१ को स्ट्राइक रेटमा २४३ रन बनाए । यस अवधिमा उनले दुई अर्धशतक पनि प्रहार गरे। उनले फाइनलमा ६२ बलमा ४८ रनको इनिङ खेले। उनी प्रतियोगिताको दोस्रो सर्वाधिक रनकर्ता थिए ।

गत वर्ष, श्रेयस र इशान किशनलाई घरेलु क्रिकेट नखेलेको कारण बीसीसीआईको केन्द्रीय सम्झौता सूचीबाट हटाइएको थियो । यसपछि, श्रेयस घरेलु क्रिकेटमा फर्किए र पछिल्लो रणजी ट्रफीमा मुम्बईका लागि पाँच खेलमा ४८० रन बनाए । श्रेयसले सैयद मुश्ताक अली ट्रफीमा नौ खेलमा ३४५ रन बनाएर चौथो सर्वाधिक रन बनाउने खेलाडी थिए । उनले विजय हजारे ट्रफी सिजन उत्कृष्ट बिताएका थिए, पाँच खेलमा ३२५.०० को प्रभावशाली औसतमा ३२५ रन बनाएका थिए ।

त्यस्तै बोर्डले अभिषेक शर्मा, नितिश रेड्डी र वरुण चक्रवर्ती पहिलो पटक केन्द्रीय सम्झौतामा समावेश गर्ने तयारी गरेको छ । तिनै जनाले राष्ट्रिय टिममा प्रभावशाली प्रदर्शन गरिरहेका छन् ।