फिल्म ‘ऊनको स्वीटर’ को टिजर सार्बजनिक

काठमाडौँ - फिल्म ‘ऊनको स्वीटर’ को ‘मखमली’ गीत सुपरहिट भएपछि फिल्मको तिजर सार्वजनिक गरिएको छ । टिजरमा विपिन कार्की र  अभिनेत्री मिरुना मगरबीचको अव्यक्त प्रेमलाई देखाइएको छ ।

फिल्मका मुख्य अभिनेता विपिन कार्की र अभिनेत्री मिरुना मगरलाई देखाइएको टिजरले फिल्मको कथाको धेरै हदसम्म संकेत गर्दछ ।

आगामी बैशाख २६ गतेबाट सार्वजनिक प्रदर्शनमा आउन लागेको फिल्मलाई नवीन चौहानले निर्देशन गरेका हुन् । यो उनको पहिलो निर्देशकीय फिल्म हो । यसअघि उनले ‘घुमी घुमी’, ‘तीन पाते’, ‘फूलथुङ्गे रानी’ जस्ता म्यूजिक भिडियो निर्देशन गरिसकेका छन् । फिल्ममा विपिन, मिरुना र विल्सनसहित सुनिल पोखरेल, माओत्से गुरुङ, प्रेम सुब्बा, एलेक्स पारस, परीक्षा लिम्बू, सुरज तमू, शारदा देवी सिलवाल लगायतको अभिनय छ ।

फिल्मलाई निर्देशक चौहानले नै लेखेका हुन् भने उनलाई लेखनमा सुरज कटुवालले सघाएका छन् । यसमा चिन्तन राजभण्डारीको छायांकन तथा कृष्ण भण्डारीको सम्पादन छ । आर्टमाण्डूको निर्माण रहेको फिल्मको कार्यकारी निर्माता सागर बुढाथोकी र मिलन खत्री हुन् ।