भाट भटेनीमा सामान लुट्नेमाथि लाठी बर्साएका गार्डलाई बढुवासहित ५ लाख नगद पुरस्कार

काठमाडौं– राजावादी आन्दोलनका क्रममा कोटेश्वरस्थित भाट भटेनी सुपर मार्केटमा लुटपाट चल्दा कर्तव्य पालना गरेका सुरक्षा गार्डको ५ ग्रेड बढुवा गरिएको छ।

कर्तव्य निर्वाह गरेको भनी उनलाई पुरस्कार नगद ५ लाख रुपैंया पनि दिइएको छ।

चैत्र १५ गते भएको राजावादी आन्दोलनका क्रममा भएको लुटपाटको क्रममा साहसिक सम्मान गर्ने सुरक्षा गार्ड डोरप्रसाद पराजुली लगायत सुरक्षा गार्ड र कर्मचारीलाई भाट भेटनी सुपर मार्केटले सम्मान गरेको हो।

त्यस्तै अन्य गार्ड र कर्मचारीहरुलाई २५ हजार नगद र एक ग्रेड प्रमोसन गरेको छ।  

सुपरमार्केटमा तोडफोड तथा लुटपाट गरिरहेको समयमा कर्तव्य निर्वाह गर्दै अग्रपंक्तिमा खटिएका कर्मचारी तथा व्यापारलाई निरन्तरता दिन रातभर मर्मत सम्भारमा लाग्न खटिएका कर्मचारीलाई सुपरमार्केटले सम्मान गरेको हो ।

लुटपाटको क्रममा पराजुलीले लुटपाटमा संलग्नमाथि गरेको कारबाही अहिले सामाजिक सञ्जालमा भाइरल छ। दर्जनौँ संख्यामा रहेका व्यक्तिहरूलाई उनले लिस्टीले कुट्दै भगाएको भिडिओ सार्वजनिक भएको थियो। 

उक्त लुटपाट र तोडफोडसहित कम्तिमा ७५ लाखको क्षती भएको भाट भटेनीका सञ्चालक मिनबहादुर गुरुङले जानकारी दिएका थिए।