धितोपत्र बोर्डबाट शेयर ब्रोकर गाभ्ने निर्देशिका जारी, कति गाभिएलान् ?

काठमाडौं– नेपाल धितोपत्र बोर्डले ‘धितोपत्र व्यवसायी गाभ्ने/गाभिने वा प्राप्ति गर्ने सम्बन्धी निर्देशिका, २०८१ जारी गरेको छ ।

बोर्डकाअनुसार अहिले सञ्चालनमा रहेका धितोपत्र व्यवसायीलाई गाभ्ने/गाभिने वा प्राप्ति गर्ने सम्बन्धी कार्यलाई व्यवस्थित गर्नका लागि बोर्डले उक्त निर्देशिका जारी गरेको हो ।

बोर्डको चैत १३ गतेको आठ सय चौधौँ बैठकबाट लागू भएको निर्देशिका धितोपत्र सम्बन्धी ऐन, २०६३ को दफा ११८ को अधिकार प्रयोग गरि बनाइएको बोर्डले जनाएको छ ।

हाल ९० वटा स्टक ब्रोकर र २ वटा स्टक डिलर बोर्डमा सूचीकृत भएर व्यवसाय गर्दै आएका छन् । बोर्डको निर्देशिकाले नियमावलीको नियम ७(क) बमोजिम धितोपत्र दलाल वा धितोपत्र व्यापारी एक आपसमा गाभ्ने/गाभिन वा प्राप्ति गर्न योग्य हुने जनाएको छ ।

गाभ्न/गाभिन चाहने व्यवसायीले सैद्धान्तिक सहमतिको लागि निवेदन दिनुपर्ने व्यवस्था निर्देशिकामा गरिएको छ । जसका लागि बोर्डले निवेदनको ढाँचासमेत तोकेको छ ।

निवेदन दिने धितोपत्र व्यवसायीले गाभ्ने/गाभिने विषयमा सञ्चालक समिति तथा साधारण सभाबाट सो सम्बन्धी निर्णय, प्रारम्भिक सम्झौता, समयबद्ध तालिकासहितको कार्ययोजना, पछिल्लो लेखापरीक्षण, कर्मचारीको व्यवस्थापन लगायतका विषयहरूमा समेत निर्णय गरेर कागजात पेश गर्नुपर्ने निर्देशिकाले व्यवस्था गरेको छ ।

बोर्डले धितोपत्र व्यवसायी गाभ्ने/गाभिने विषय उचित देखेमा निवेदन दिएको १५ दिनभित्र सैद्धान्तिक सहमति दिनसक्ने निर्देशिकामा उल्लेख छ । सैद्धान्तिक सहमति प्राप्त गरेको व्यवसायीले आफ्नो सम्पत्ति तथा दायित्व तथा व्यावसायिक कारोबारको पछिल्लो अवधिको मूल्याङ्कन गराउनुपर्ने व्यवस्था निर्देशिकाले गरेको छ ।

त्यसरी मूल्याङ्कन गर्दा धितोपत्र व्यवसायीको गणना गरिएको समायोजित खुद सम्पत्तिलाई ७५ प्रतिशत, भविष्यमा प्राप्त हुने नगद प्रवाहको वर्तमान मूल्यलाई १५ प्रतिशत र अन्तर्राष्ट्रिय भ्यालुएसन स्टान्डर्डको आधारमा गणना गरिएको अन्य कुनै एक विधि प्रयोग गरिएको मूल्याङ्कनलाई १० प्रतिशत गणना गरिने निर्देशिकाले व्यवस्था गरेको छ ।

साथै, निर्देशिकाले कायम हुन आएको मूल्यमा १० प्रतिशतले थपघट गरी स्वाप अनुपात कायम गर्न सकिने समेत व्यवस्था गरेको छ ।

निर्देशिकाअनुसार गाभ्ने/गाभिने व्यवसायीबीचमा पछि कायम हुने कार्यालय, सम्पत्ति मूल्याङ्कन पद्धति, गाभिन वा प्राप्ति गर्न लाग्ने समय, नयाँ बन्ने पुँजी संरचना, सञ्चालक समिति, कर्मचारी लगायतका विषयमा अन्तिम सम्झौता गर्नुपर्ने हुन्छ ।

दुई पक्षबीचमा अन्तिम सम्झौता भएपछि साधारण सभाबाट गाभ्ने/गाभिने, स्वाप अनुपात लगायतका विषयमा निर्णय भएपछि १५ दिनभित्र अन्तिम स्वीकृतिको लागि पुनः बोर्डमा निवेदन दिनुपर्ने हुन्छ । अन्तिम स्वीकृतिको लागि निवेदन दिँदा विभिन्न नयाँ बन्ने व्यवसायको ११ वटा विषयका कागजात पेश गर्नुपर्ने हुन्छ ।

अन्तिम स्वीकृति दिएपछि गाभ्ने/गाभिने कार्य ६ महिनाभित्र सम्पन्न गर्नुपर्ने र उक्त प्रयोजनका लागि निवेदनअनुसार कारोबार रोक्का गर्नसक्ने व्यवस्था छ ।

साथै, गाभ्ने/गाभिने पश्चात बन्ने नयाँ दलाल व्यवसायीले शाखा कार्यालय खोल्न सक्ने र एउटा पक्षको मुख्य कार्यालयलाई शाखा कार्यालय बनाउनसमेत पाइने भएको छ ।