राजावादी आन्दोलनमा राज्यलगायतप्रति संविधानविद आचार्यको कटाक्ष, स्ट्याटस उडेपछि अर्को के लेखे? 

काठमाडौं– संविधानविद डा. भिमार्जुन आचार्यले राजावादी आन्दोलनका क्रममा निहत्था नागरिकमाथि भएको गोली प्रहारबारे प्रश्न खडा गरेका छन्।
सामाजिक सञ्जालमार्फत उनले असन्तुष्टिसहित प्रश्न गरेका हुन्। 

संविधानविद् डा. भीमार्जुन आचार्यले गत शुक्रबार (चैत १५) काठमाडौंको तीनकुनेमा राजावादी प्रदर्शनका क्रममा भएको हिंसा र सरकारको बल प्रयोगको घटनामा निष्पक्ष छानबिनको माग गरेका हुन्।

उनले निहत्था नागरिकलाई गोली हानेर मारिएको भिडिओ फुटेज सार्वजनिक भएको र पत्रकार सुरेश रजकको मृत्युमा रहस्य देखिएको भन्दै सरकारले आफ्नै गृह प्रशासनमाथि तत्काल छानबिन गर्नुपर्ने बताएका छन्।

सामाजिक सञ्जाल एक्समा डा. आचार्यले लेखेका छन्, ‘सरकारले प्रदर्शनमा संलग्न केहीलाई गिरफ्तार गरेर आफ्नो काम सकिएको भान पार्न खोजेको देखिन्छ। बाटोमा फर्कँदै गरेको निहत्था नागरिकलाई गोली हानेर मारिएको भिडियो फुटेज सार्वजनिक भएका छन्। सरकारले अब आफ्नै गृह प्रशासनमाथि यो घटनाको छानबिन गरोस्।’ 

उनी अगाडि भन्छन्,‘पत्रकार सुरेशजीको मृत्युबारे पनि थुप्रै रहस्य बाहिर आएका छन्। सरकारले यी दुई घटनाको अविलम्ब छानबिन गरोस्। यो समाज अझै पूरै मृत भइसकेको छैन, यो पनि हेक्का राखोस्।’

यसैबीच सामाजिक सञ्जाल फेसबुकमा राखेको उनको स्ट्याटस उडेपछि अर्को पनि राखेका छन्। उनले भनेका छन्,‘मेरो भर्खरैको स्टाटस् फेसबुमा सिन छैन। लोकतन्त्रको कार्यान्वन शुरू भए जस्तो छ।’