देशभरिका शिक्षक काठमाडौं आइपुगे, आजको र्‍यालीमा डेढ लाख सहभागी हुने

काठमाडौं- विद्यालय शिक्षा ऐन जारी गर्न माग गर्दै देशभरिका शिक्षकहरू काठमाडौ आइपुगेका छन् ।

शिक्षक महासंघको अगुवाइमा हुन लागेको आन्दोलनमा सहभागी हुन शिक्षकहरू काठमाडौ आइपुगेका हुन । महासंघको सहअध्यक्ष एवं आन्दोलन परिचालन समितिको संयोजक नानुमाया पराजुलीका अनुसार आजको र्‍यालीमा डेढ लाख शिक्षक कर्मचारी सहभागी हुने छन् ।

‘शिक्षकहरू काठमाडौ भित्रनु भएको छ । आज डेढ लाख शिक्षक कर्मचारीको र्‍याली निस्कन्छ,’ उनले भनिन्, ‘भोलि शिक्षक कर्मचारी थप थपिनु हुन्छ ।’

आन्दोलनलाई शान्तिपूर्ण बनाउन ८ सय स्वयंसेवक परिचालन गरिएको उनले बताइन् । ‘हाम्रो आन्दोलन शान्तिपूर्ण हुन्छ । अनुशासित र मर्यादित बनाउन ८ सय स्वयंसेवक परिचालन गरेका छौ । प्रदेश प्रदेशबाट पनि १००/१०० जना परिचालन गरिएको छ,’ उनले भनिन् ।

विगतको सहमति अनुसार ऐन जारी भए तत्काल आन्दोलन छोडेर घर फर्किने उनले बताइन । ‘सरकारसँग सौदाबाजी छैन । विगतको सहमति अनुसर विद्यालय शिक्षक विद्यार्थी कर्मचारी मैत्री अग्रगामी ऐन तत्काल जारि गरियोस् भन्ने एक सित्रीय माग हो,’ उनले भनिन् ।

शिक्षा विधेयक संसदमा दर्ता भएपछि २०८० असोज ३ मा शिक्षकहरू सडक आन्दोलनमा आएका थिए । तीन दिनको आन्दोलनपछि सरकारसँग महासंघसहित अन्य संघसंगठनबीच असोज ५ मा ६ बुँदे सम्झौता भएको थियो । सो सहमति अनुसार ऐन जारी गर्न शिक्षकहरूले माग गरेका छन् । तर हिउँदे अधिवेशन अन्त्य भएको छ ।हाल विधेयक संसदको शिक्षा समितिमा छलफलको क्रममा छ । वर्खे अधिवेशनमा संसदमा पेस गर्ने गरि समितिले उपसमिति बनाएर काम गरिरहेको छ ।