भारतले गरिदियो नेपाली सिमेन्ट र प्लाइउडको ‘बीआईएस’ नवीकरण, अब निर्यात खुल्ने

काठमाडौं -भारतले नेपाली सिमेन्ट र प्लाइउडको ‘बीआईएस’ प्रमाणपत्र नवीकरण गरेको छ ।

भारतले बीआईएस नवीकरण नगर्दा नेपालबाट पाँच महिनादेखि भारततर्फको सिमेन्ट निर्यात र एक महिनादेखि प्लाइउड निर्यात रोकिएको थियो ।

नेपाल प्लाइउड उत्पादक संघ अध्यक्ष होमप्रसाद घिमिरे भारतले अहिले धमाधम बीआईएस नवीकरण गरिरहेको बताउँछन् ।

‘१०–१२ वटा उद्योगको बीआईएस नवीकरण भएको छ,’ अध्यक्ष घिमिरेले भने, ‘अरू उद्योगको पनि आउने क्रममा छ । भारतले अहिले बीआईएस सहज बनाइदिएको छ ।’

अध्यक्ष घिमिरेको नेतृत्वमा प्लाइउड एसोसिएसनको टोली भारतमा डेलिगेसन गएको थियो । बीआईएसको अन्तर्राष्ट्रिय विषय हेर्ने प्रमुखसँग छलफल भएको र उनले सहजीकरण गर्ने बताएको अध्यक्ष घिमिरेले जानकारी दिए ।

अब बीआईएस पाउनका लागि ३४ प्लाइउड उद्योग बाँकी छन् । ती उद्योगमध्ये १५ उद्योगको पनि एक महिनाभित्र आइसक्ने उनले बताए ।

यस्तै रुपन्देहीस्थित अर्घाखाँची सिमेन्टको पनि बीआईएस नवीकरण भएको छ । अर्घाखाँची सिमेन्ट उद्योग सञ्चालक पशुपति मुरारकाले आज बुधबार भारतले बीआईएस नवीकरण गरिदिएको जानकारी दिए ।

‘अर्घाखाँची सिमेन्टको आज बीआईएस नवीकरण भएर आएको छ,’ उनले भने, ‘अब भारततर्फ सहज रूपमा सिमेन्ट निर्यात हुनेछ ।’

अहिले अन्य दुई–तीन वटा सिमेन्ट उद्योगले भारतमा निर्यात गरिरहेका छन् । उनीहरूको बीआईएस प्रमाणपत्र म्याद अझै एक महिना बाँकी छ । नवीकरण नभएका आधा दर्जन सिमेन्ट उद्योग पनि एक महिनाभित्र बीआईएस पाउने सूचीमा रहेको उद्योगीहरूले बताएका छन् ।

भारतले अहिले प्लाइउड, सिमेन्ट र स्टिल लगायत उद्योगको पनि बीआइएस नवीकरण सहजीकरण गरिरहेको उद्योगीहरू बताउँछन् ।