मस्क नेतृत्वको सरकारी दक्षता विभाग बन्द हुने संकेत !

काठमाडौँ - राष्ट्रपति डोनाल्ड ट्रम्पको दोस्रो कार्यकालमा सिर्जना गरिएको सरकारी दक्षता विभाग (डोज ) चाँडै बन्द हुने भएको छ । 

अर्बपति व्यवसायी एलन मस्कले हालै डोज छोड्ने संकेत गरका छन् । राष्ट्रपति ट्रम्पले यस हप्ता पत्रकारहरूलाई मस्क कुनै पनि समय आफ्ना कम्पनीहरू सञ्चालन गर्न काममा फर्कने बताएर यसको संकेत गरेका छन् । मस्कले छोडेपछि यो विभाग बन्द हुने बताइएको छ ।

मस्कले डोजमा आफ्नो सक्रियता देखाउदै विभिन्न अन्वाश्यक खर्च र कर्मचारी कटौती गर्न शुरु गरेदेखि अमेरिकामा उनको खासगरी टेस्ला गाडीको कम्पनिले ठुलो क्षति बेहोर्नु पर्नेको छ । डेमोक्रेट पार्टी र उसका समर्थकले टेस्ला गाडी बहिष्कारको अभियान नै चलाएका छन् । यसको असर अमेरिकामा मात्र होइन युरोपमा पनि परेको छ । टेस्लाले शेयर बजारमा ठुलो घाटा बेहोरेको छ भने बिक्री पनि घटेको छ । टेस्लाको बिक्री वर्षको पहिलो तीन महिनामा १३ प्रतिशतले घटेको छ ।

ह्वाइट हाउसले सरकारी दक्षता विभाग बन्द गर्ने स्पष्ट समयसीमा दिएको छैन। यो संस्था सरकारी खर्च घटाउनको लागि सिर्जना गरिएको हो । सुरुमा यो विभाग ४ जुलाई २०२६ सम्म सञ्चालन गर्ने योजना थियो । तर अब यो बन्द हुन सक्ने संकेत देखिएको छ । यसका कर्मचारीहरूलाई विभिन्न संघीय एजेन्सीहरूमा स्थानान्तरण गरिएको छ, जसले अब लागत कटौतीको जिम्मेवारी लिनेछ । मस्क र ट्रम्पले राखेका लक्ष्यहरू प्राप्त गर्न सरकारमा ठूलो मात्रामा कर्मचारी कटौती भइरहेको छ ।

मस्क नेतृत्वको यो विभाग बन्द गरेर ट्रम्प प्रशासनको रणनीति अब नयाँ चरणमा प्रवेश गर्ने बताइएको छ, जहाँ मस्कको भूमिका घटाइने बताइएको छ । मस्कको आक्रामक अडानले उनलाई प्रशासनमा एक विवादास्पद व्यक्ति बनाएको छ ।

सरकारी दक्षता विभाग सुरुमा एक स्वतन्त्र सल्लाहकार समितिको रूपमा स्थापित गरिएको थियो, जसमा मस्कले उद्यमी विवेक रामास्वामीसँग नेतृत्व बाँडफाँड गरेका थिए । तर रामास्वामीले यसबाट आफूलाई टाढा राखे र अब ओहायोको गभर्नर पदको लागि चुनाव लडिरहेका छन् । यसपछि, यो विभागलाई औपचारिक रूपमा सरकारको हिस्सा बनाइयो ।

सरकारी दक्षता विभागमा मस्कका सहयोगीहरू थिए, जसलाई सम्झौता रद्द गर्न, संवेदनशील डेटामा पहुँच प्राप्त गर्न र लागत घटाउन सरकारी प्रणालीभरि विभिन्न स्थानहरूमा पठाइएको थियो । मस्कको कार्यकालको निश्चित समय सीमा छ । उनलाई विशेष सरकारी कर्मचारीको रूपमा नियुक्त गरिएको थियो, जसको अर्थ उनी ३६५ दिनमा १३० दिन मात्र काम गर्न सक्ने गरि नियुक्ति दिइएको थियो ।