यशस्वी जयसवालले मुम्बई छोडे, गोवाबाट घरेलु क्रिकेट खेल्ने

काठमाडौँ - भारतीय ओपनर यशस्वी जयसवालले अर्को सिजन गोवाबाट घरेलु क्रिकेट खेल्ने भएका छन् । यति मात्र होइन, उनलाई गोवाको कप्तान पनि बनाउन सकिने भारतीय मिडियाहरुले उल्लेख गरेका छन् ।

२३ वर्षीय भारतीय ओपनर यशस्वीले मुम्बई क्रिकेट संघ (एमसीए) बाट नो-अब्जेक्सन सर्टिफिकेट (एनओसी) मागेको मिडिया रिपोर्टमा उल्लेख छ । एमसीएले जयसवालको माग स्वीकार गरेको छ ।

जयसवालले अन्तिम पटक जनवरी २३ देखि २५ सम्म जम्मू र कश्मीरविरुद्ध रणजी ट्रफीमा मुम्बईका लागि खेलेका थिए । त्यो खेलमा जयस्वालले ४ र २६ रन बनाएका थिए ।

गोवा क्रिकेट संघका सचिव शाम्भा देसाईले आफ्नो राज्यबाट खेल्न चाहने सबैलाई स्वागत गर्ने बताउदै जब उनी राष्ट्रिय ड्युटीमा हुँदैनन् र घरेलु क्रिकेटको लागि उपलब्ध हुन्छन्, त्यति बेला उनलाई कप्तान बनाइने बताइन ।

जयसवाल मुम्बई छोडेर गोवाबाट खेल्ने तेस्रो क्रिकेटर हुन् । उनीभन्दा पहिले अर्जुन तेन्दुलकर र सिद्धार्थ लाडले मुम्बई छोडेर गोवाबाट खेलेका छन् । तेन्दुलकर-लाड २०२२-२३ सिजनमा गोवाका लागि खेलेका थिए । त्यसपछि सिद्धार्थ पनि मुम्बई फर्किए । उनी कुलिङ पिरियडमा पनि रहे ।

जयसवालले जुलाई २०२३ मा वेस्ट इन्डिजविरुद्ध टेस्ट डेब्यू गरेका थिए र त्यसबेलादेखि उनी ओपनरको रूपमा पहिलो रोजाइ बनेका छन् । उनले डेब्यू गरेदेखि भारतका लागि १९ खेल खेलेका छन् र उत्कृष्ट प्रदर्शन गरेका छन् । उनले टेस्टमा भारतको लागि खेल्दा चार शतक र १० अर्धशतक बनाएका छन्।