मेयरसँग समन्वय नगरी कसरी चल्न सक्छन् काठमाडौं महानगरका प्रमुख प्रशासकीय अधिकृत?

काठमाडौं– ढोका फोरेर कुर्सीमा बसेपछि काठमाडौं महानगरपालिकाका प्रमुख प्रशासकीय अधिकृत सरोज गुरागाँईले खासै प्रतिक्रिया दिएनन्।
पत्रकारले सोधेको प्रश्नमा उनले भने,‘म भोली पर्सी कुरा गर्छु।’

महानगर प्रहरी बलको अवरोध, कर्मचारीको घम्साघम्सी र जनप्रतिनिधिलाई साक्षी राखेर पनि प्रत्यक्ष रुपमा सरोकार राख्नुपर्ने मेयर बालेन शाहसँगको कुनै समन्वयबिना गुरागाँईले महानगरको प्रशासनिक काम हाँक्नेगरी प्रवेश गर्नु एउटा विषय भयो तर कार्यान्वयनमा जान कठिन हुनेछ।

कर्मचारीतन्त्र बुझेका एक जना पूर्वसहसचिव भन्छन्,‘स्थानीय सरकारको प्रमुखसँगको सरोकारबिना त प्रमुख प्रशासकीय अधिकृतले कसरी काम गर्न सक्ला र? नियमित आउने तलब त दिन सकिएला तर तोक नलगाएका विषयमा काम गर्न सक्ने आधार देखिन्न।’

गुरागाँई बालेनलाई गलाउनका लागि संघीय सरकारले तयार पारेर पठाएको कर्मचारीका रुपमा पनि परिचित छन्। यसैकारण सामान्य प्रशासन मन्त्रालयमा उनले हाजिरी गर्न पाउँ भनेर पत्र पठाएका कारण उनको फेरबदल भएन। 

सामान्य प्रशासन मन्त्रालय एमालेसँग छ र प्रधानमन्त्री तथा एमाले अध्यक्षसमेत रहेका केपी शर्मा ओली काठमाडौं महानगर प्रमुख बालेनसँग परोक्ष ‘इगो’ साँध्न चहान्छन्। 

यसको नेपथ्यको कारण हो,‘गिरिबन्धु चिया बगानको जग्गाको विषयमा बालेनले छानबिनका लागि गरेको आग्रह र कटाक्ष।’

सरुवा हुनासाथ गुरागाँईलाई काठमाडौं टावर प्रकरणमा बालेनले भ्रष्टाचार गरेको भनी विदामा राखी निमित्त प्रमुख प्रशासकीय अधिकृत तयार पारेका थिए। तर, उनले पनि राजीनामा दिएपछि गुरागाँई एमालेको प्रयोगका आधारमा एक सय ३ दिनपछि दाँतमा ढुङ्गो बोकेर छिरेका छन्। 

बालेन स्वतन्त्र उम्मेदवारीमार्फत मेयरमा निर्वाचित भएका कारण कार्यपालिका र परिषदमा रहेका उपप्रमुख सुनिता डंगोलसहित सत्ता साझेदार कांग्रेससहितका वडाध्यक्ष र जनप्रतिनिधिको साथ लिएर गुरागाँई छिरेका हुन्। 

‘गुरागाँई एक कर्मचारी भएका कारण के सही र के गलत भन्ने कुरामा हेक्का राख्न सक्ने हुनुपर्छ। मेयरको सहयोगी बन्न सकिएन भने भोलीका दिनमा कसरी काम गर्ने भन्ने हेक्का राखिनुपर्छ’, ति पूर्वसहसचिव भन्छन्,‘दबाब र प्रभाव निक्कै हुन्छ। तर, भ्रष्टाचारबिरोधी प्रभाव धान्ने भन्दा पनि सहयोगी हुनुपर्नेमा परम्परागत दलको भारी बोक्नु राम्रो होइन।’