काठमाडौँ उपत्यकामा प्रदुषण : शुक्रबार बिहान पनि अति अस्वस्थ तहमा

काठमाडौँ - काठमाडौँ उपत्यकामा प्रदुषण शुक्रबार बिहान पनि उच्च रहेको छ ।

मौसम पूर्वानुमान महाशाखाले स्थानीय वायुको प्रभाव र पश्चिमी न्यून चापीय प्रणालीको प्रभावका कारण वर्षा हुन नसकेको जनाएको छ भने प्रदुषण बढेर काठमाडौँ विश्वकै प्रदुषित शहरको सूचीमा शिर्ष स्थानमा रहेको छ।

‘एयर क्वालिटि इन्डेक्स’ को शुक्रबार बिहान साढे ५ बजेको लाइभ रिपोर्ट अनुसार काठमाडौँ विश्वको सबै भन्दा प्रदूषित सहरका रूपमा कायम रहेको छ । यो समाचार तयार गरुन्जेल काठमाडौँको वायु प्रदूषण २१६ एक्युआई पुगेको छ । जुन अति अस्वस्थ तह हो ।  

काठमाडौँ पछि भारतको नयाँ दिल्ली दोस्रो स्थानमा छन् । दिल्लीको प्रदुषण १९९ एक्युआई पुगेको छ । 

प्रदुषण मापन गर्दा १५० सम्मको एयर क्वालिटी इन्डेक्सलाई सन्तोषजनक मानिन्छ भने २०० सम्मलाई अस्वस्थ र २०१ देखि ३०० सम्म अति अस्वस्थ तथा ३०१ भन्दा माथिलाई आपत्कालीन अवस्था मानिएको छ ।

उच्च प्रदुषण बढेपनि सरकारले यसबाट सतर्क रहन ठोस कदम चालेको देखिएको छैन । विहिबार राष्ट्रिय विपद जोखिम न्यूनीकरण तथा व्यवस्थापन प्राधिकरणले एक अनुरोध जारी गर्दै काठमाडौँको वायु प्रदुषण खतराको तह नजिक पुगेको उल्लेख गर्दै सम्भव भएसम्म घरमै बस्न, कार्यालयको कम पनि घरबाट व्यवस्थापन गर्न अनुरोध गरेको थियो ।

वायुप्रदूषण विज्ञहरुले काठमाडौँमा अझै एक हप्ता प्रदुषणमा सुधार नहुने बताएका छन् ।