ट्रम्पको पछिल्लो भन्सार सूचीबाट छुटेकोमा मेक्सिकोका राष्ट्रपतिद्वारा स्वागत

मेक्सिको सिटी - मेक्सिकोका राष्ट्रपति क्लाउडिया सेनबामले बिहीबार अमेरिकी राष्ट्रपति डोनाल्ड ट्रम्पको पछिल्लो चरणको भन्सार करहरूको सूचीमा आफ्नो देशलाई समावेश नगरिएकामा स्वागत गरेकी छन् । 

उनले पत्रकारहरूलाई अमेरिकी प्रशासनसँगको उनको सरकारको ‘राम्रो सम्बन्ध’ का कारण मेक्सिको बाँचेको बताइन् ।

संयुक्त राज्य अमेरिकासँगको नजिकको व्यापारिक सम्बन्ध र मुक्त व्यापारमा अमेरिका–मेक्सिको–क्यानाडा सम्झौता (युएसएमसिए) को संयुक्त सदस्यताका कारण मेक्सिकोको अर्थतन्त्रलाई ट्रम्पको भन्सार करहरूका लागि सबैभन्दा संवेदनशील मानिन्छ ।

मेक्सिकोको ८० प्रतिशतभन्दा बढी निर्यात संयुक्त राज्य अमेरिकामा जान्छ । यसमा वार्षिक लगभग ३० लाख सवारी साधन समावेश छन् । ल्याटिन अमेरिकी राष्ट्र मेक्सिकोमा फोर्ड, जनरल मोटर्स, बिएमडब्लु, फोक्सवागन र टोयोटा लगायतका कम्पनीद्वारा सञ्चालित धेरै विदेशी स्वामित्वका सवारी साधन असेम्बली प्लान्टहरू छन् ।

अर्थमन्त्री मार्सेलो एबरार्डले बिहीबार युएसएमसिए अक्षुण्ण रहेको बताउँदै यसलाई उनले ‘प्रमुख उपलब्धि’ का रूपमा वर्णन गरे । मेक्सिकोले आगामी ४० दिनमा अटोमोबाइल, स्टिल र एल्युमिनियममा द्विपक्षीय व्यापारका लागि ‘उत्तम अवस्था’ खोज्ने उनले बताए।

यसअघि ट्रम्पले मेक्सिको र क्यानाडालाई २५ प्रतिशत कर लगाउने धम्की दिएका थिए । ती दुई छिमेकीले लागुऔषध तस्करी र कागजातविहीन आप्रवासीहरूलाई संयुक्त राज्य अमेरिकामा प्रवेश गर्न दिएको आरोप लगाएका थिए । 

मेक्सिकोका लागि भन्सार शुल्क पहिले नै युएसएमसिए अन्तर्गत नसमेटिएका सबै उत्पादनहरूका लागि लागू भएको छ ।