राजावादी आन्दोलनमा ब्यापक दमनमा प्रहरीले एसएलआर, इन्सास, पेस्तोल प्रयोग गरेको गोप्य प्रतिवेदन

काठमाडौं– चैत १५ गते तीनकुनेमा राजसंस्थावादीको आन्दोलनमा व्यापक दमन गरिएको प्रहरी प्रतिवेदन प्रधान कार्यालयमा बुझाएको तथ्य र विवरणका खबरहरू बाहिरिएका छन्।

प्रधान कार्यालयले पत्रकार सम्मेलन गरी उक्त दिन भएको घटनाका विषयमा दिएको विवरण पनि झूठो रहेको दाबी भैरहेका छन्।

ज्ञानेन्द्र शाहका समर्थकले हिंसात्मक प्रदर्शन, लुटपाट र आगजनी गरेको घटनामा प्रहरीले सुरक्षा रणनीति होइन, घातक हतियारको सहारा लिएको प्रहरीकै गोप्य प्रतिवेदनबाट खुलेको हिमालखबरको अनलाइन संस्करणले दाबी गरेको छ।

राजावादीले शान्तिपूर्ण भनेको प्रदर्शनमा दुई जनाको ज्यान गएको र प्रदर्शनकारीले निजी सम्पत्तिमा आगजनी तथा लुटपाट गरिएको घटनासँगै सुरक्षाकर्मीको भूमिकामाथि पनि प्रश्न उठेको छ। 

तीनकुने घटनामा प्रहरीको कमजोरी देखाउने एकपछि अर्को भिडिओ सार्वजनिक हुन थालेपछि प्रहरी प्रधान कार्यालयले एकाएक चैत २० गते प्रतिरक्षा गर्न पत्रकार सम्मलेन गरेको थियो।

प्रवक्ता प्रहरी नायव महानिरीक्षक (डीआईजी) दिनेशकुमार आचार्यले ‘प्रहरीले न्यूनतम बल प्रयोग’ गरेको बताएका थिए। तर, त्यो झूठो विवरण रहेको पनि दाबी गरिएका छन्। 

आचार्यले भीड नियन्त्रण गर्न ५८ राउन्ड गोली र ७६४ वटा अश्रुग्यास प्रहार गरेको थियो। ५८ राउन्डमध्ये कति जंगी राउन्ड (साँच्चिकैको गोली), कति हवाई फायर र कति रबर बुलेट हो भन्ने उनले खुलाएका थिएनन्। 

जिल्ला प्रहरी परिसर काठमाडौंले चैत २० गते तयार पारेको एक गोप्य रिपोर्टमा भने डीआईजी आचार्यले भनेको भन्दा दोब्बर संख्यामा त ‘जंगी राउन्ड’ नै फायर भएको उल्लेख छ। 

हिमालखबरको अनलाइन संस्करणले दाबी गरेअनुसार उसलाई प्राप्त ३९ पृष्ठको रिपोर्टमा प्रहरीले सो दिन प्रहार गरेको ‘जंगी राउन्ड’ को संख्या मात्रै ९२ छ। डरलाग्दो पक्ष त के छ भने यसमध्ये सबैभन्दा बढी गोली अर्धस्वचालित हतियार ‘सेल्फ लोडिङ’ राईफल (एसएलआर) बाट भएको छ। 

त्यस्तै एसलआरबाट ८१ राउन्ड गोली प्रहार भएको थियो, जुन कुल ‘जंगी राउन्ड’ गोली प्रहारको ८८ प्रतिशत हो। अर्को अर्धस्वचालित हतियार इन्सासबाट ६ राउन्ड, सर्ट गनबाट तीन राउन्ड, चिनियाँ पेस्तोलबाट दुई राउन्ड गोली प्रहार भएको रिपोर्टमा उल्लेख छ। 

यसरी ९४ प्रतिशत गोली अर्धस्वचालित हतियार इन्सास र एसएलआरबाट प्रहार भएको हिसाब निस्कन्छ। यस्तै सशस्त्र प्रहरीले छुट्टै १८ राउन्ड गोली चलाएको प्रतिवेदनमा उल्लेख छ। 

एसएलआर, इन्सास घातक प्रकृतिका हतियार हुन्, जुन भीड नियन्त्रणमा अन्तिम अवस्थामा मात्रै प्रयोग गरिन्छ। तर प्रहरीले शुरूमै यी दुई खाले घातक हतियारबाटै सबैभन्दा बढी गोली चलाएको देखिन्छ। तीनकुने क्षेत्रमा प्रहरीको २० वटा ‘कमान्ड टोली’ खटिएका थिए। रबर बुलेट भने प्रहरीले २०१ राउन्ड प्रहार गरेको थियो। 

विस्तृत विवरणका लागि यहाँ क्लिक गर्नुहोस्