बलिवुडका दिग्गज अभिनेता मनोज कुमारको निधन

काठमाडौँ - बलिवुडका 'पुरब और पश्चिम', 'रोटी, कपडा और मकान' र 'क्रांति' जस्ता उत्कृष्ट फिल्ममा अभिनय गरेका दिग्गज अभिनेता मनोज कुमारको ८७ वर्षको उमेरमा निधन भएको छ । 

मनोज कुमारको मुम्बईस्थित कोकिलाबेन धिरुभाई अम्बानी अस्पतालमा अन्तिम सास लिएको भारतीय मिडियाहरुले उल्लेख गरेका छन् । 'भरत कुमार' को नामले परिचित मनोज कुमार आफ्ना फिल्महरू मार्फत देशभक्तिको भावना जगाएको रुपमा चिनिन्छन् । 

मनोज कुमारको सबैभन्दा लोकप्रिय फिल्महरू मध्ये एक, 'उपकार' (१९६७), एक विशेष बैठकबाट जन्मिएको थियो । १९६५ मा भारत-पाकिस्तान युद्ध पछि, तत्कालीन प्रधानमन्त्री लाल बहादुर शास्त्रीले उनको फिल्म 'शहीद' हेरेका थिए । भगत सिंहको जीवनमा आधारित यो फिल्मबाट प्रभावित भएर शास्त्री जीले मनोजलाई उनको लोकप्रिय नारा 'जय जवान जय किसान' मा फिल्म बनाउन आग्रह गरे । मनोजले यो सुझावलाई हृदयंगम गरे र दिल्लीबाट मुम्बई रेलमा फर्कने क्रममा 'उपकार' को कथा लेखे । फिल्म सुपरहिट मात्र भएन, यसको गीत 'मेरे देश की धरती' ले देशभक्तिको भावनालाई नयाँ उचाइमा पुर्‍यायो ।

मनोज कुमारको जन्म २४ जुलाई १९३७ मा पाकिस्तानको एबटाबादमा भएको थियो । १९४७ मा भारत-पाकिस्तान विभाजनको समयमा, उनको परिवार दिल्ली आयो, जहाँ उनले शरणार्थी शिविरहरूमा कठिन दिनहरू बिताए । यस समयमा, देशको लागि केही गर्ने भावना उनको मनमा जरा गाड्यो । भगत सिंहबाट गहिरो प्रभावित भएर मनोजले सिनेमालाई माध्यमको रूपमा रोजे र 'शहीद', 'पूरब और पश्चिम', 'क्रान्ति' जस्ता चलचित्रहरू मार्फत देशभक्तिलाई पर्दामा ल्याएका थिए । 

१९७० को दशकमा, जब अमिताभ बच्चन आफ्नो निरन्तर असफलताबाट निराश थिए र मुम्बई छोडेर दिल्ली फर्कने निर्णय गरेका थिए, मनोज कुमारले उनलाई रोकेको बताइन्छ । उनले अमिताभलाई आफ्नो फिल्म 'रोटी, कपडा और मकान' (1974) मा मौका दिए । यो फिल्म हिट भयो र अमिताभको करियरलाई नयाँ दिशा दिएको थियो ।
उनको निधनमा भारतीय प्रधानमन्त्री नरेन्द्र मोदी, रक्षामन्त्री राजनाथ सिंहलगायतले दुख व्यक्त गरेका छन् ।